សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អគ្គស្នងការដ្ឋាននគរបាលជាតិ និងនគរបាលជាតិបារាំង នៅព្រឹកថ្ងៃសុក្រ ៧រោច ខែភទ្របទ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី៦ ខែតុលា ឆ្នាំ២០២៣នេះ បានរៀបចំពិធីបិទវគ្គបំប៉នជំនាញប្រយុទ្ធប្រឆាំងបទល្មើសជួញដូរគ្រឿងញៀន ក្រោមអធិបតីភាព លោកនាយឧត្ដមសេនីយ៍ ម៉ក់ ជីតូ អគ្គស្នងការរងនគរបាលជាតិ ទទួលបន្ទុកការងារប្រយុទ្ធប្រឆាំងបទល្មើសគ្រឿងញៀន តំណាងដ៏ខ្ពង់ខ្ពស់ លោកនាយឧត្តមសេនីយ៍ ស ថេត អគ្គស្នងការនគរបាលជាតិ នៅទីស្តីការក្រសួងមហាផ្ទៃ។
ពីវេទិកាអធិបតី លោកនាយឧត្ដមសេនីយ៍ ម៉ក់ ជីតូ បានមានប្រសាសន៍ ថ្លែងអំណរគុណចំពោះក្រសួងមហាផ្ទៃ នៃសាធារណៈរដ្ឋបារាំង ដែលកន្លងមកបានជួយបណ្តុះបណ្តាលជំនាញ ដល់មន្រ្តីនគរបាលជាតិកម្ពុជា ឱ្យកាន់តែមានសមត្ថភាពបន្ថែមទៀត ក្នុងការប្រយុទ្ធប្រឆាំងបទល្មើសគ្រឿងញៀន ។ លោកនាយឧត្តមសេនីយ៍ បន្តថា វគ្គបណ្តុះបណ្តាលបំប៉នជំនាញ ដែលនឹងត្រូវបានបិទបញ្ចប់នៅថ្ងៃនេះ គឺបានផ្តល់បទពិសោធន៍ និងចំណេះដឹងថ្មីមួយទៀត សម្រាប់សិក្ខាកាមទាំងអស់ដែលជាមន្រ្តីអនុវត្តច្បាប់ ថ្វីត្បិតតែមានរយៈពេលខ្លី ក៏ប៉ុន្តែយើងបានយល់ដឹងច្រើនពីសភាពការណ៍សកល ពីសភាពការណ៍នៅប្រទេសបារាំង និងសភាពការណ៍គ្រឿងញៀននៅកម្ពុជា។
លោកនាយឧត្ដមសេនីយ៍ អគ្គស្នងការរង មានប្រសាសន៍បន្តថា៖ នៅក្នុងអាណាត្តិទី០៧ នៃរាជរដ្ឋាភិបាល ដែលដឹកនាំដោយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី ក្នុងនោះមាន លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកនាយឧត្ដមសេនីយ៍ ស ថេត អគ្គស្នងការនគរបាលជាតិ បានយកចិត្តទុកដាក់យ៉ាងខ្លាំងក្នុងការកំណែទម្រង់កងកម្លាំង ហើយនេះជាអាទិភាពទី១ ក្នុងគោលនយោបាយរបស់រាជរដ្ឋាភិបាល នោះគឺ ការបង្ការ បង្ក្រាបបទល្មើសគ្រឿងញៀន ដើម្បីរក្សាសុវត្ថិភាព សន្តិសុខ សណ្ដាប់ធ្នាប់ជូនប្រជាពល។
លោកនាយឧត្ដមសេនីយ៍ ម៉ក់ ជីតូ បានបន្ថែមថា ៖ គ្រឿងញៀននេះហើយ គឺជាកម្មវត្ថុកង្វល់សកល មិនមែនតែកម្ពុជានោះទេ ដែលវាប៉ះពាល់ដល់សុខភាព និងបង្កមហន្តរាយជាច្រើនដោយសារបទឧក្រិដ្ឋនានា។ ដូចយើងបានដឹងច្បាស់ហើយក្នុងបណ្ដាបទឧក្រិដ្ឋនានា ដែលកើតមានឡើងក្នុងសកលលោក និងនៅកម្ពុជា ៧០ភាគរយ គឺឧក្រិដ្ឋជនដែលប្រព្រឹត្តិបទល្មើសតែងតែប្រើប្រាស់គ្រឿងញៀន។ ដូចនេះ ក្នុងនាមយើងជាអ្នកអាជីព ជាយុទ្ធជនប្រយុទ្ធប្រឆាំងគ្រឿងញៀន ត្រូវតែរួមគ្នាបង្ការ បង្រ្កាបបទល្មើសគ្រឿងញៀន ឱ្យសកម្មដើម្បីសុវត្ថិភាពសង្គម។
ក្នុងឱកាសនោះ លោកនាយឧត្ដមសេនីយ៍ ម៉ក់ ជីតូ ក្នុងនាម លោកនាយឧត្ដមសេនីយ៍ ស ថេត អគ្គស្នងការនគរបាលជាតិ បានសម្ដែងនូវការកោតសរសើរ និងថ្លែងអំណរគុណដល់លោកស្រី Marianne Flour-Bourril ជាគ្រូឧទេសនាម, អ្នកបកប្រែ និងសិក្ខាកាមទាំងអស់ ដែលបានខិតខំប្រឹងប្រែងរៀនសូត្រ ក្រេបជញ្ជក់យកចំណេះចេះដឹង ដើម្បីយកទៅបម្រើអង្គភាពឲ្យមានប្រសិទ្ធភាព។ លោកនាយឧត្តមសេនីយ៍ ក៏កត់សម្គាល់ឃើញដែរថា វគ្គសិក្សានេះថ្វីត្បិតតែពាក់ព័ន្ធច្រើនទៅលើសភាពការណ៍ កិច្ចសហប្រតិបត្តិការ រចនាសម្ព័ន្ធ ក៏ដូចជាវិធីស្រាវជ្រាវប្រមូលភស្តុតាង ការបង្ក្រាប របស់នគរបាល នៃក្រសួងមហាផ្ទៃ សាធារណៈរដ្ឋបារាំង ក៏ពិតមែន ប៉ុន្តែជាមេរៀនមួយដែលមានគុណតម្លៃ និងប្រសិទ្ធភាពសម្រាប់សិក្ខាកាមទាំងអស់យកទៅអនុវត្តន៍ ពីសេសត្រូវយកមកឆ្លុះបញ្ជាំងជាមួយនឹងសកម្មភាពប្រចាំថ្ងៃ ក៏ដូចជាផែនការសកម្មភាពរបស់នគរបាលប្រឆាំងគ្រឿងញៀនរបស់កម្ពុជាយើង។ ទោះបីថាច្បាប់នៃប្រទេសទាំងពីរមានភាពខុសគ្នាអំពីនីតិវិធី ការអនុវត្ត ក៏ប៉ុន្តែគោលដៅរួមតែមួយគឺ ស្រាវជ្រាវ រកឲ្យឃើញបង្ក្រាបឲ្យបាន និងប្រមូលភស្តុតាងបញ្ជូនទៅតុលាការដូចគ្នា។
ជាចុងក្រោយ លោកនាយឧត្ដមសេនីយ៍ អគ្គស្នងការរង បានផ្តាំផ្ញើដល់សិក្ខាកាមទាំងអស់ ក្រោយពីបញ្ចប់វគ្គបណ្តុះបណ្តាលនេះទៅ ត្រូវយកចំណេះចេះដឹងទាំងនេះ ផ្សព្វផ្សាយដល់មន្ត្រីក្រោមឱវាទ ក៏ដូចជាបងប្អូនរួមអាជីព ជាពិសេសក្នុងការងារប្រឈម បង្ការ ការពារ ពេលបងប្អូនចុះប្រតិបត្តិការ។
សូមបញ្ជាក់ថា វគ្កបណ្ដុះបណ្ដាលនេះ មានរយៈពេល០៥ថ្ងៃ ចាប់ពីថ្ងៃទី២ ដល់ថ្ងៃទី៦ ខែតុលា ឆ្នាំ២០២៣ ដោយមានសិក្ខាកាម សរុបចំនួន ២០រូប មកពីមន្ទីរប្រឆាំងគ្រឿងញៀន ,ស្នងការដ្ឋាននគរបាលខេត្តព្រះសីហនុ,ស្នងការដ្ឋាននគរបាលខេត្តកណ្ដាល ,ស្នងការដ្ឋាននគរបាលខេត្តកំពង់ចាម ,ស្នងការដ្ឋាននគរបាលខេត្តតាកែវ និងស្នងការដ្ឋាននគរបាលខេត្តស្វាយរៀង៕
ដោយ៖សហការី
