សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មានករណីបាក់អគារមួយកន្លែងក្នុងសង្កាត់ផ្សារកណ្តាលទី២ ខណ្ឌដូនពេញ នាវេលាម៉ោង ២២:៣០នាទីយប់ ថ្ងៃអង្គារ ៩រោច ខែអស្សុជ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៧ ខែវិច្ឆិកា ឆ្នាំ២០២៣ ។
លោក ជា ខេមា អភិបាល នៃគណៈអភិបាលខណ្ឌដូនពេញ បានដឹកនាំកម្លាំងចុះពិនិត្យដល់ទីតាំងអគារស្នាក់នៅរួមមួយកន្លែងដែលបានបាក់ស្រុតនេះ បន្ទាប់ពីមានភ្លៀងលាយខ្យល់យ៉ាងខ្លាំងនៅក្នុងភូមិសាស្រ្តរាជធានីភ្នំពេញ។ ឆ្លៀតក្នុងឱកាសនេះ រដ្ឋបាលខណ្ឌដូនពេញ សូមជម្រាបជូនថាចំពោះសំណង់អគារស្នាក់នៅរួមដែលមានសភាពចាស់ទ្រុឌទ្រោមនេះគឺស្ថិតនៅតាមបណ្តោយផ្លូវលេខ១៤៨ ភូមិ៥.៦ សង្កាត់ផ្សារកណ្តាលទី២ ខណ្ឌដូនពេញ ដែលត្រូវបានអជ្ញាធរសង្កាត់-ខណ្ឌជូនដំណឹងដល់ប្រជាពលរដ្ឋដែលរស់នៅទីតាំងនេះមេត្តាចាកចេញពីអគារដើម្បីការពារសុវត្ថិភាពឲ្យរួចផុតពីគ្រោះថ្នាក់ចៃដន្យផ្សេងៗដែលអាចកើតមានឡើងជាយថាហេតុនេះរួចមកហើយនាពេលកន្លងមក។
សូមបញ្ជាក់ថា ចំពោះការបាក់ស្រុតអគារចាស់នេះមិនបណ្តាលឲ្យមានការប៉ះពាល់ដល់អាយុជីវិត ឬរងរបួសណាមួយដល់បងប្អូនប្រជាពលរដ្ឋនោះទេព្រោះដោយសារតែមិនមានអ្នកស្នាក់នៅក្នុងអគារនេះឡើយ៕
ដោយ ៖ ភារ៉ា ដង្កោ
