សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្ពុជា នឹងស្ថិតក្នុងចំណោមប្រទេសដែលមានសេដ្ឋកិច្ចលូតលាស់លឿនបំផុតទាំង ២០ នៅទូទាំងពិភពលោកក្នុងឆ្នាំ ២០២៤ ជាមួយកំណើនផលិតផលក្នុងស្រុកសរុប (GDP) នឹងកើនឡើង ៦.១ ភាគរយ ។ នេះបេីយោងតាមការព្យាករណ៍របស់មូលនិធិរូបិយវត្ថុអន្តរជាតិ (IMF) ។
របាយការណ៍ដដែល បានបង្ហាញថា ប្រទេសដែលមានកំណើនសេដ្ឋកិច្ចលឿនបំផុតក្នុងចំណោមប្រទេសកំពូលទាំង ២០ នៅលើពិភពលោកនៅឆ្នាំ ២០២៤ នោះគឺមកពីអាស៊ី និងអនុតំបន់សាហារ៉ាអាហ្រ្វិក ។
ចំពោះប្រទេសដែលមានកំណើនផលិតផលក្នុងស្រុក (GDP) ខ្ពស់ជាងគេដែលត្រូវបាន IMF ព្យាករណ៍នោះគឺ តំបន់រដ្ឋបាលពិសេសម៉ាកាវនៃប្រទេសចិន ដែលនឹងមានកំណើន ២៧.២ ភាគរយនៅឆ្នាំ ២០២៤ ខណៈប្រទេសហ្គីយ៉ាន ស្ថិតនៅលំដាប់លេខ ២ មានកំណើន ២៦.៦ ភាគរយ ។ សម្រាប់ប្រទេសឥណ្ឌា មានកំណើនត្រឹមតែ ៦.៣ ភាគរយប៉ុណ្ណោះ ។
ដោយឡែកនៅក្នុងតំបន់អាស៊ានវិញក្រៅពីកម្ពុជា, ប្រទេសហ្វីលីពីន នឹងមានកំណើនសេដ្ឋកិច្ច ៥.៩ ភាគរយ ខណៈវៀតណាម នឹងមានកំណើន ៥.៨ ភាគរយសម្រាប់ឆ្នាំ ២០២៤ ។
គួរបញ្ជាក់ថា មូលនិធិរូបិយវត្ថុអន្តរជាតិ IMF បានព្យាករណ៍កំណើនសេដ្ឋកិច្ចពិភពលោកជាមធ្យមនឹងមានកំណើន ២.៩ ភាគរយនៅឆ្នាំ២០២៤ផងដែរ៕
ដោយ៖ សហការី
