សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ទីតាំងលក់គ្រឿងសម្អាង និងអាហារបំប៉នហួសសុពលភាព គ្មានប្រភពច្បាស់លាស់ និងគ្មានច្បាប់អនុញ្ញាត បានជិត៦តោន ត្រូវបានកម្លាំងនគរបាលប្រឆាំងបទល្មើសសេដ្ឋកិច្ច ចុះបង្ក្រាបនិងរឹបអូសបាន ព្រមទាំងឃាត់ខ្លួនម្ចាស់ទីតាំងម្នាក់ យកមកនាំយកទៅសាកសួរដើម្បីចាត់វិធានការទៅតាមច្បាប់។ នេះបេីយោងតាមរបាយការណ៍របស់នគរបាលប្រឆាំងបទល្មើសសេដ្ឋកិច្ច ដែលទើបទទួលនាថ្ងៃទី២៣ ខែវិច្ឆិកា ឆ្នាំ២០២៣។
ប្រភពដដែលបន្តថា កម្លាំងនាយកដ្ឋាននគរបាលប្រឆាំងបទល្មើសសេដ្ឋកិច្ច នៃអគ្គស្នងការដ្ឋាននគរបាលជាតិ សហការជាមួយសមត្ថកិច្ចមូលដ្ឋាន និងមន្ត្រីជំនាញរបស់ក្រសួងសុខាភិបាល បានចុះបង្ក្រាបទីតាំងករណីនាំចូលគ្មានប្រភពច្បាស់លាស់ សន្និធិ លក់ចែកចាយផលិតផលគ្រឿងសម្អាង និងអាហារបំប៉នគ្មានច្បាប់អនុញ្ញាតិ នៅផ្ទះលេខ BA11+BA12 ផ្លូវបេតុង សង្កាត់ចោមចៅ២ ខណ្ឌពោធិ៍សែនជ័យ ក្រោមការសម្របសម្រួលនីតិវិធីផ្ទាល់របស់លោក វង្ស សាវ៉ាត ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ។
ក្រោយពីការឆែកឆេរត្រួតពិនិត្យជាក់ស្តែង សមត្ថកិច្ចបានរកឃើញ និងដកហូតនូវវត្ថុតាងគ្រឿងសម្អាង និងអាហារបំប៉នសរុបចំនួន៤៨មុខ ទំងន់៥,៦៤១គីឡូក្រាម នៅក្នុងនោះមានចំនួន២៩មុខគ្មានច្បាប់។ ដោយឡែកចំនួន៩មុខ មានវិញ្ញាបនប័ត្រប្រវេទន៍ ប៉ុន្តែហួសសុពលភាព និងមានច្បាប់តែចំនួន១០មុខប៉ុណ្ណោះ ដែលនាំចូលគ្មានប្រភពច្បាស់លាស់ គ្មានប្រវេទន៍ និងគ្មានច្បាប់អនុញ្ញាតិជាដើម។
របាយការណ៍ដដែល បានគូសបញ្ជាក់ថា ចំណែកវត្ថុតាងដែលដកហូតបាននោះ ត្រូវបានលោកព្រះរាជអាជ្ញារង សម្រេចឲ្យបិទផ្លុំបេនៅទីតាំងកើតហេតុ និងបាននាំខ្លួនម្ចាស់ទីតាំងយកមកសារសួរបំភ្លឺ នៅនាយកដ្ឋាននគរបាលប្រឆាំងបទល្មើសសេដ្ឋកិច្ច ដើម្បីបន្តនីតិវិធី៕
ដោយ៖ សហការី
