សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានការស្រែកទ្រហ៊ោរយំនិងអោយអ្នកភូមិជួយសង្គ្រោះប៉ុន្តែអកុសលហួសពេលទៅហើយបន្ទាប់ពីក្មេងស្រី ជិះកង់តាមជីដូនពីក្រោយ ធ្លាក់ចូលប្រឡាយលង់ទឹកស្លាប់ ។
ហេតុការណ៍នេះបានកើតឡើងកាលពីវេលាម៉ោង១២និង៤៥នាទីរសៀល ថ្ងៃទី២៨ខែវិច្ឆិកាឆ្នាំ២០២៣ នៅចំណុចភូមិសំបួរ ឃុំសំបួរ ស្រុកស្វាយទាប ខេត្តស្វាយរៀង ។
យោងតាមសមត្ថកិច្ចនគរបាលបានអោយដឹងថា ក្មេងស្រីខាងលើមានឈ្មោះ ស៊ិន ស្រីណុច អាយុ០៨ឆ្នាំជនជាតិខ្មែរ សញ្ជាតិខ្មែរ មានទីលំនៅភូមិសំបួរ ឃុំសំបួរ ស្រុកស្វាយទាប ខេត្តស្វាយរៀង ។
បើតាមជីដូនបានរៀបរាប់ប្រាប់សមត្ថកិច្ចថា មុនកើតហេតុគាត់ជាជីដូនបានដើរទៅកន្លែងស្រែកំពុងច្រូតខណៈនោះចៅស្រីក៏បានជិះកង់ទៅជាមួយពីក្រោយ លុះដល់ លើភ្លឺប្រឡាយ ស្រាប់តែ រេចង្កូតកង់ធ្លាក់ចូលប្រឡាយ រំពេចនោះ គាត់ក្រឡេកឃើញ ក៏បានស្រែកហៅអោយអ្នកជិតខាង ប្រញាប់ប្រញាល ជួយសង្គ្រោះ និងស្រង់ បី ព្រមទាំងដឹកយកទៅមន្ទីរពេទ្យបង្អែកស្រុកស្វាយទាបប៉ុន្តែអកុសល គ្រូពេទ្យបានបញ្ជាក់ប្រាប់ថា កុមារីខាងលើបានលង់ទឹកស្លាប់បាត់ទៅហើយ។
ក្រោយមកសព ក្មេងស្រី ត្រូវបានក្រុមគ្រួសារដឹកមកកាន់ទីលំនៅធ្វើបុណ្យតាមប្រពៃណីទាំងក្ដុកក្ដួលបំផុត៕
ដោយ៖ សុថាន
