សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែង៖ សកម្មភាពកាប់រានដីព្រៃសាងសង់ផ្ទះនៅតំបន់ក្រឡាពស់ ស្រុកសេសាន និងស្រុកសៀមប៉ាង កំពុងកើនឡើងយ៉ាងអនាធិបតេយ្យ ខណៈមន្រ្តីបរិស្ថានប្តឹងមេខ្លោង៣នាក់ទៅតុលាការ ។
តាមសេចក្តីរាយការណ៍បានឲ្យដឹងថា មានអ្នកកាប់រានដីព្រៃសាងសង់ផ្ទះជាច្រើនខ្នង នៅតំបន់ក្រឡាពស់ ស្ថិតនៅស្រុកសេសាន និងស្រុកសៀមប៉ាង កំពុងធ្វើសកម្មភាពយ៉ាងអនាធិបតេយ្យភាគច្រើនជាជនជាតិខ្មែរអ៊ិស្លាម ដោយមានការបំផុសពីមេខ្លោងជាជនជាតិខ្មែរអ៊ិស្លាម៣នាក់។
ទាក់ទងនឹងការកាប់រានដីព្រៃសាងសង់ផ្ទះ បើតាមលោកទូច វិចិត្រ នាយកដែនជម្រកសត្វព្រៃ ព្រៃឡង់ បានឲ្យដឹងថា កម្លាំងរបស់លោកបានសហការជាមួយ អាជ្ញាធរស្រុកសេសានដឹកនាំដោយលោក សុវណ្ណ ពិសេដ្ឋ បានចុះធ្វើការទប់ស្កាត់ និងថែមទាំងស្រាវជ្រាវរកឃើញមេខ្លោងចំនួនបីនាក់ ហើយបានកសាងសំណុំរឿងបញ្ជូនទៅតុលាការថែមទៀតផង។
បើតាមរបាយការណ៍របស់លោកនាយកដែនជម្រកសត្វព្រៃព្រៃឡង់ បានឲ្យដឹងថា មេខ្លោងងទាំងបីនាក់នោះរួមមាន ៖
១.ឈ្មោះ ស្លេះ វើត ។
២.ស្រ្តីឈ្មោះ សៅ សម៉ា (ហៅយាយម៉ា) ។
៣.ឈ្មោះ ស្លេះ ម៉ាត ដោយពួកគេបំផុសពលរដ្ឋចូលកាប់ព្រៃ ដោយទិញក្នុងតម្លៃពី១.០០០ដុល្លារអាមេរិក ទៅ១.៥០០ដុល្លារអាមេរិក ក្នុង១ក្បាលដី។
បើទោះបីយ៉ាងណា គេមិនទាន់ដឹងថា តើតុលាការចាត់ការបែបណានៅឡើយ ទើបមានសកម្មភាពកាប់រានដីព្រៃសាងសង់ផ្ទះកើតឡើងយ៉ាងអនាធិបតេយ្យបែបនេះ៕
ដោយ ៖ ជីវ័ន្ត
