សារព័ត៌មាន នគរវត្ត តែងតែនាំមុខគេជានិច្ច
ក្រុមបាល់ទាត់ស្រ្តីជម្រើសជាតិអេស្ប៉ាញ បានឡើងមកកាន់លេខរៀងទី១របស់សហព័ន្ធបាល់ទាត់ពិភពលោក(FIFA)ជំនួសក្រុមជម្រើសជាតិស៊ុយអែតវិញ បន្ទាប់ពីពួកគេឈ្នះពានរង្វាន់ពិភពលោកWorld Cup។
ក្រុមជម្រើសជាតិអេស្ប៉ាញបានយកឈ្នះក្រុមជម្រើសជាតិអង់គ្លេសក្នុងវគ្គផ្តាច់ព្រ័ត្តកាលពីខែសីហាហើយហក់មកឡើងលេខរៀងទី២ពិភពលោក ប៉ុន្តែពួកគេក៏បន្តឡើងមកកាន់លេខ១ពិភពលោកតែម្តងដោយសារតែពួកគេលេងបានកាន់តែល្អនៅក្នុងកម្មវិធី UEFA Women’s Nations League។ អេស្ប៉ាញលេងឈ្នះ៥ប្រកួតឈរកំពូលតារាងក្នុងពូលបានឆ្លងទៅលេងវគ្គផ្តាច់ព្រ័ត្តក្នុងខែកុម្ភៈខាងមុខដោយត្រូវប៉ះក្រុមជម្រើសជាតិស្រ្តីហុល្លង់។
ក្រុមជម្រើសជាតិអាមេរិកបានឡើងមកកាន់លេខរៀងទី២វិញខណៈបារាំងឈរលេខរៀងទី៣ ហើយបារាំងក៏នឹងលេងនៅកម្មវិធី UEFA Women’s Nations Leagueដោយជួបក្រុមជម្រើសជាតិអាល្លឺម៉ង់។ ចំណែកក្រុមម្ចាស់ជើងឯកទ្វីបអឺរ៉ុបអង់គ្លេសឈរលេខរៀងទី៤ពិភពលោកហើយក្រុមជម្រើសជាតិស៊ុយអែតធ្លាក់មកលេខរៀងទី៥វិញ ៕
ដោយ៖ ភារៈ
