សារព័ត៌មាន នគរវត្ត តែងតែនាំមុខគេជានិច្ច
ដើម្បីផ្លាស់ទីកងទ័ពឱ្យបានលឿននិងមានសុវត្ថិភាពជាងមុនទៅកាន់តំបន់ព្រំដែន ប្រទេសចិនបានសាងសង់ផ្លូវហាយវេថ្មីមួយទៅកាន់ព្រំដែនជាមួយប្រទេសឥណ្ឌា។
បន្ទាប់ពីទទួលរងនូវការបាត់បង់ជីវិតនៅក្នុងការប៉ះទង្គិចគ្នានៅជ្រលងភ្នំ Galwan ជាមួយកងទ័ពឥណ្ឌាក្នុងឆ្នាំ 2020 ប្រទេសចិនបានពន្លឿនការសាងសង់ផ្លូវហាយវេ៉ថ្មីមួយនៅជិតព្រំដែនដ៏តានតឹងរបស់ខ្លួនជាមួយឥណ្ឌា។ ផ្លូវហាយវេ៉ថ្មី (G216) នឹងជួយចិនប្រមូលកម្លាំងបានយ៉ាងឆាប់រហ័សក្នុងស្ថានភាពប្រឈមមុខដូចជាការប៉ះទង្គិចគ្នាក្នុងឆ្នាំ២០២០។
ផ្លូវហាយវេ៉ថ្មីនេះត្រូវបានពិពណ៌នាដោយអ្នកជំនាញ EurAsian Times ថាជា “សុបិនចាស់របស់ចិន” ហើយត្រូវបានចាត់ទុកថាជាការផ្លាស់ប្តូរយុទ្ធសាស្ត្រដ៏សំខាន់នៅក្នុងតំបន់ព្រំដែនជាមួយប្រទេសឥណ្ឌាចាប់តាំងពីឆ្នាំ1950។ ពីមុនប្រទេសចិនក៏បានសាងសង់ផ្លូវហាយវេ៉តែមួយគត់ (G219) នៅ Ladakh ប៉ុន្តែស្ថានភាពលំបាកបានរារាំងយ៉ាងខ្លាំងដល់ផែនការអភិវឌ្ឍន៍ហេដ្ឋារចនាសម្ព័ន្ធនៅក្នុងតំបន់នេះ។
នៅក្នុងតំបន់ Ladakh ប្រទេសចិនមានការព្រួយបារម្ភអំពីផ្លូវហាយវេ៉G219 (Akshai Chin) ព្រោះវារត់តាមបណ្តោយព្រំដែនខាងលិច និងខាងត្បូងទាំងមូលរបស់ប្រទេសចិនដែលតភ្ជាប់តំបន់ Xinjiang ជាមួយទីបេ។ វាត្រូវបានសាងសង់នៅលើដី Aksai Chin ដែលជាតំបន់ជម្លោះជាមួយប្រទេសឥណ្ឌា។
ផ្លូវហាយវេ៉តែមួយនេះងាយរងការវាយប្រហារដោយកងទ័ពឥណ្ឌា ហើយឥឡូវនេះប្រទេសចិនហៀបនឹងលុបបំបាត់ភាពទន់ខ្សោយរបស់ខ្លួនដោយបញ្ចប់ផ្លូវជំនួសដែលគេស្គាល់ថាជា G216។
ផែនការសាងសង់បណ្តាញផ្លូវល្បឿនលឿនអាចនាំយោធាចិនចូលទៅក្នុង “តំបន់ក្តៅ” នាពេលអនាគត ហើយទីក្រុងប៉េកាំងក៏បានប្រកាសផែនការនេះក្នុងខែកក្កដា ឆ្នាំ 2022 ដោយមានគោលបំណងបង្កើត “ផ្លូវយុទ្ធសាស្ត្រ” តភ្ជាប់ស៊ីនជាំងនិងទីបេ។ Newsweek បានវិភាគវីដេអូដែលមានជាសាធារណៈដែលបង្ហាញពីផ្នែកថ្មីនៃផ្លូវហាយវេ៉ G216 ដែលឥឡូវនេះផ្តល់ឱ្យអ្នកធ្វើដំណើរចូលទៅកាន់ Xinjiang ។
នៅក្នុងខែវិច្ឆិកា ឆ្នាំ 2023 ទូរទស្សន៍រដ្ឋចិន CCTV បានប្រកាសពីការបើកផ្លូវរូងក្រោមដីថ្មីមួយពី Urumqi ទៅស្រុក Yuli នៅក្នុងតំបន់ Xinjiang ។ ផ្លូវរូងក្រោមដីត្រូវបានគេនិយាយថាមានប្រវែងវែងជាងគេក្នុងពិភពលោក។ ការសាងសង់ផ្លូវរូងក្រោមដីត្រូវបានប្រារព្ធឡើងជាច្រើននៅលើប្រព័ន្ធផ្សព្វផ្សាយសង្គម ប៉ុន្តែសារៈសំខាន់ជាយុទ្ធសាស្រ្តរបស់វាគឺវឌ្ឍនភាពក្នុងការភ្ជាប់តំបន់នៅតាមព្រំដែនដែលមានជម្លោះជាមួយឥណ្ឌានៅ Ladakh ។
ប្រទេសចិនបានពន្លឿនដំណើរការសាងសង់នៅលើផ្លូវហាយវេ៉ G216 បន្ទាប់ពីការប៉ះទង្គិចគ្នានៅជ្រលងភ្នំ Galwan ក្នុងខែឧសភា ឆ្នាំ2020 ជាមួយកងទ័ពឥណ្ឌា។ ជាលទ្ធផល កងទ័ពនៃប្រទេសទាំងពីរនៅតែធ្លាក់ចូលទៅក្នុងការប្រឈមមុខដាក់គ្នាខាងយោធានៅព្រំដែន៕
ដោយ៖ ធីរីណា(រូបថត៖ vtc.vn)
