សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ ចិត្តស្រឡាញ់ ស្រឡាញ់ស្មោះ ចិត្តប្រុសទាំងអស់ស្មោះលើកនិដ្ឋា ស្រឡាញ់អូនទុកស្មើនេត្រា សង្ខារប្តូរនឹងគ្នា ពេលគេងចំបែងក្នុងចិត្ត រៀមគេងហើយគិត ព្រោះចិត្តនៅអាល័យ ។ នេះជាបទ ៖ «វិលវិញមកអូន» ច្រៀងដោយ អធិរាជសំឡេងមាស លោក សុិន សុីសាមុត មិនខុសអីពី បុរសម្នាក់នៅខេត្តស្វាយរៀង អង្វរភរិយា …. មកវិញមកអូន ប្តីនឹកប្រពន្ធនឹងកូនខ្លាំងណាស់ កំហុសទាំងប៉ុន្មានសូមទទួលខុសគ្រប់យ៉ាង ! បន្ទាប់ពីនាងចាកចេញពីផ្ទះអស់រយៈពេល១សប្តាហ៍ ។
សូមបញ្ជាក់ថា ៖ ប្តីប្រកាសប្រាប់ប្រពន្ធសូមអូនវិលវិញមក បងនឹកអូននិងកូន… បុរសម្នាក់បានប្រាប់អ្នកសារព័ត៌មានថា ៖ ប្រពន្ធរបស់គាត់បានចុះចោលផ្ទះ ព្រមទាំងយកកូនតូចទៅជាមួយផងមិនដឹងថា ទៅរស់នៅទីកន្លែងណា គឺចេញទៅបាត់រយៈពេល៧ថ្ងៃហើយ មូលហេតុឈ្លោះប្រកែកគ្នាបន្តិចបន្តួចជាមួយខ្លួនជាប្តី ។
បុរសនេះឈ្មោះ ជុំ រ៉ាវុធ រស់នៅភូមិសង្គម ឃុំគគីរសោម ស្រុកស្វាយទាប ខេត្តស្វាយរៀង បានបាត់ប្រពន្ធនិងកូន ដោយប្រពន្ធបានចុះចេញពីផ្ទះនៅថ្ងៃកើតហេតុ គឺថ្ងៃទី១ មករា ២០២៤ ខណ:ដែល ខ្លួននិងភរិយាបានឈ្លោះទាស់ទែងគ្នាបន្តិចបន្តួច ។ ស្រាប់តែភរិយាគាត់ឈ្មោះ ក្រី កឹមស្រុី ដែលរស់នៅភូមិសង្គម ឃុំគគីរសោម ស្រុកស្វាយទាប បានជិះម៉ូតូចេញពីផ្ទះថែមទាំងបានយកកូនប្រុសតូចទៅជាមួយផងដែរ ។
លោកប្តីបានប្រកាសដោយសុភាពថា«ប្រពន្ធសំឡាញ់ត្រឡប់មកផ្ទះវិញប្តីរង់ចាំជានិច្ច ។ បងនឹកប្រពន្ធនិងកូនណាស់ សូមអូនត្រឡប់មកផ្ទះយើងវិញមក» ។ ដូច្នេះអង្វរដូចសំនៀងអធិរាជសំឡេងមាស បើកបេះដូងទទួល គាត់នឹងត្រឡប់មកវិញហើយ៕
ដោយ ៖ សិលា
