សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ លោកយាយម្នាក់វ័យ៦៧ឆ្នាំ បានដេីរឆ្លងកាត់ផ្លូវជាតិលេខ៣ បំណងចូលវត្តកាន់សីល៍ តែអកុសលត្រូវរថយន្តឃ្លុបបេីកបុក និងកិនស្លាប់យ៉ាងរន្ធត់ បង្កការភ្ញាក់ផ្អេីលកាលពីវេលាម៉ោង០៦ និង១០នាទីព្រឹក ថ្ងៃទី១៨ ខែមករា ឆ្នាំ២០២៤ត្រង់ចំណុចមុខវត្តទឹកថ្លា ផ្លូវជាតិលេខ០៣ ស្ថិតនៅភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ ។
សមត្ថកិច្ចបានឱ្យដឹងថា សពជនរងគ្រោះមានឈ្មោះ វង់ សាវឿន ភេទស្រី អាយុ៦៧ឆ្នាំ មុខរបរ នៅផ្ទះ មានទីលំនៅភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ (ស្លាប់នៅកន្លែងកើតហេតុ)។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនកេីតហេតុនោះគេឃេីញជនរងគ្រោះពាក់អាវស និងមានកាន់របស់របបសម្រាប់ប្រគេនព្រះសង្ឃ រួចដេីរឆ្លងផ្លូវបំណងមកវត្តដេីម្បីកាន់សីល៍ ខណៈដេីរឆ្លងពីកេីតមកលិចបានពាក់កណ្ដាលផ្លូវ ក៏ត្រូវរថយន្តឃ្លុប ម៉ាក JAC HFC ពណ៌ស ពាក់ផ្លាកលេខ ភ្នំពេញ 2BV-9183 ធ្វេីដំណេីរតាមបណ្ដោយផ្លូវជាតិលេខ៣ ទិសដៅពីជេីងមកត្បូងបុក និងកិនជនរងគ្រោះស្លាប់យ៉ាងរន្ធត់ ។ ភ្លាមៗតៃកុងរថយន្តបង្កឈប់រថយន្ត ចុះគេចខ្លួនបាត់ ដោយសមត្ថកិច្ចបានឃាត់អ្នករួមដំណើរម្នាក់ឈ្មោះ លន់ ឌីណា ភេទប្រុស អាយុ២២ឆ្នាំមុខរបរកម្មករលើកបន្លែ មានទីលំនៅភូមិតាំងរលាង ឃុំកំពង់ពិល ស្រុកពារាំង ខេត្តព្រៃវែង (ពុំមានរងរបួស និងបានប្រគល់ឱ្យការិយាល័យចរាចរណ៍ផ្លូវគោករាជធានីភ្នំពេញដើម្បីសួរនាំ) ។
ក្រោយកេីតហេតុ ករណីគ្រោះថ្នាក់ចរាចរណ៍ខាងលើ សមត្ថកិច្ចមូលដ្ឋានបានប្រគល់ឱ្យទៅការិយាល័យចរាចរណ៍ផ្លូវគោករាជធានីភ្នំពេញ ដោះស្រាយបន្តតាមនីតិវិធី ។ ដោយឡែកសពជនរងគ្រោះ សមត្ថកិច្ចជំនាញបានប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី៕
ដោយ ៖ ភារ៉ា ដង្កោ
