សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីតាមប្រភពព័ត៌មានពីនាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ បានឱ្យដឹងថា លោកយាយម្នាក់ បានបាត់បង់អាយុជីវិតក្នុងហេតុការណ៍គ្រោះថ្នាក់អគ្គិភ័យដែលបានកេីតឡើងក្នុង ភូមិច្រេះ សង្កាត់គោកឃ្លាង ខណ្ឌសែនសុខ រាជធានីភ្នំពេញ។
ប្រភពដដែលបន្តថា ហេតុការណ៍ខាងលេីនេះ បានកេីតឡេីងនៅវេលាម៉ោង ៥ និង១០នាទីល្ងាចថ្ងៃទី១៩ ខែមករា ឆ្នាំ២០២៤ មានករណីអគ្គិភ័យឆេះផ្ទះប្រជាពលរដ្ឋមួយកន្លែងបានកើតឡើងនៅចំណុចផ្ទះលេខ ១៧ ផ្លូវបេតុង៩២ ភូមិច្រេះ សង្កាត់គោកឃ្លាង ខណ្ឌសែនសុខ រាជធានីភ្នំពេញ ម្ចាស់ទីតាំង ឆាយ អ៊ាន ភេទ ប្រុស អាយុ ៨៥ ឆ្នាំ ជនជាតិ ខ្មែរ មុខរបរ លក់ដូរ ។
មន្រ្តីជំនាញ បានគូសបញ្ជាក់ថា ទីតាំងឆេះជាប្រភេទសំណង់ ថ្មប្រក់ស័ង្កសីទំហំ ០៥ម៉ែត្រ គុណនឹង១២ម៉ែត្រ ។ មូលហេតុមន្ត្រីជំនាញកំពុងបន្តការស្រាវជ្រាវ ។
ចំណែកខូចខាតសម្ភារៈ ឆេះផ្ទះថ្មប្រក់ស័ង្កសីអស់មួយផ្នែកខាងក្រោមរួមមានម៉ូតូចំនួន ០២ គ្រឿង និងសម្ភារៈអស់ទាំងស្រុង ហើយពុំបានឆេះរាលដាលដល់អ្នកក្បែរខាងឡើយ ។
ស្លាប់មនុស្សម្នាក់ ឈ្មោះ គ្រៀល អៀង ភេទស្រី អាយុ ៨៥ ឆ្នាំ ។ គ្មានមនុស្សរងរបួសនោះទេ។
សូមជម្រាបថា កងកម្លាំងបង្ការពន្លត់អគ្គិភ័យនិងសង្គ្រោះ បានប្រេីប្រាស់រថយន្តរបស់ការិយាល័យអគ្គិភ័យស្នងការដ្ឋាននគរបាលរាជធានីភ្នំពេញចំនួន ១១ គ្រឿង ប្រេីប្រាស់ទឹកអស់ចំនួន ១១ រថយន្ត ស្មើរនឹង ៤៤ ម៉ែត្រគូប៕
ដោយ៖ តារា
