សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ សមត្ថកិច្ចនគរបាលបានធ្វើការឃាត់ខ្លួនជនសង្ស័យ១នាក់ ក្នុងចំណោម៤នាក់ក្នុងករណីលួចនិងគាស់ដំបូលម៉ាតយកសម្ភារមួយចំនួននៅក្រុងបាវិត។
ការឃាត់ខ្លួនធ្វើឡើងនៅវេលាម៉ោង៣ និង៣០នាទីទៀបភ្លឺឈានចូលថ្ងៃទី១២ ខែកុម្ភៈ ឆ្នាំ២០២៤ វេលាម៉ោង០៣៖៣០នាទីទៀបភ្លឺ នៅចំណុចដីឡូត៍ ផ្លូវព្រៃយាយ ភូមិបាវិតកណ្តាល សង្កាត់បាវិត ក្រុងបាវិត។
សមត្ថកិច្ចនគរបាលបានអោយដឹងថាជនសង្ស័យដែលឃាត់ខ្លួនមានឈ្មោះ រ៉ូន ឈីត អាយុ២៤ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិកោះក្បាន ឃុំសំរោង ស្រុកចន្ទ្រា ខេត្តស្វាយរៀង បច្ចុប្បន្នស្នាក់នៅបន្ទប់ជួលស្ថិតនៅសង្កាត់បាវិត ក្រុងបាវិត ខេត្តស្វាយរៀង។
ប្រភពបន្តថា នៅចំពោះមុខសមត្ថកិច្ច ជនសង្ស័យបានឆ្លើយសារភាពថា នៅវេលាម៉ោង២រំលងអធ្រាត្រឈានចូលថ្ងៃទី១២ ខែកុម្ភៈ ឆ្នាំ២០២៤ រូបខ្លួនកំពុងដេកនៅក្នុងបន្ទប់ជួលក្រោយផ្សារអន្តរជាតិបាវិត ស្រាប់តែមានលេខទូរស័ព្ទឈ្មោះ អាផាន់ណា បានទូរស័ព្ទមកប្រាប់ខ្លួនថា អោយយកម៉ូតូទៅដឹកអីវ៉ាន់ដែលពួកវាលួចបាន។ ភ្លាមនោះខ្លួនក៏យកម៉ូតូមួយគ្រឿងម៉ាក វ៉េវ ពណ៌ខ្មៅ ស្លាកលេខ វៀតណាម 70K-1402.42 និងសម្ភារមួយចំនួនយកទៅសម្រាប់ដឹកអីវ៉ាន់។ ពេលទៅដល់ក្រោយម៉ាតនោះស្រាប់តែមានសមត្ថកិច្ចមកដល់ និងឃាត់ខ្លួនរូបគេសួរនាំតែម្ដង។
ជនសង្ស័យបានឆ្លើយបន្តទៀតថា ពួកខ្លួនមានគ្នាសរុបទាំងអស់ចំនួន០៤នាក់ និង បានធ្វើសកម្មភាពលួចនិងគាស់ដំបូលម៉ាតនេះលួចយកអីវ៉ាន់ (មី ប្រេងឆា កំព្យូទ័រ នំ) បានម្ដងមកហើយ ហើយយកទៅលក់យកលុយចែកគ្នាអស់ហើយ។
សម្ភារដែលសមត្ថកិច្ចដកហូតបានរួមមានម៉ូតូ ០១គ្រឿង ម៉ាក វ៉េវ ពណ៌ខ្មៅ ពាក់ស្លាកលេខ 70-K1 402.42 វត្ថុមានមុខស្រួចសម្រាប់វះយកអីវ៉ាន់ កាត់ដំបូលចំនួន ០៥ដើម ទួណឺវីសចំនួន០១ កន្រ្ទៃ០១ ខ្សែកៅស៊ូសម្រាប់រឹតចងអីវ៉ាន់ចំនួន០១ខ្សែ ។
ប្រភពបន្តថា ក្រោយពីបានចម្លើយ សមត្ថកិច្ចបានចុះទៅដល់កន្លែងកើតហេតុ ឃើញថា ផ្ទះដែលក្រុមជនសង្ស័យធ្វើសកម្មភាពគាស់កាត់ដំបូលចូលលួចអីវ៉ាន់ជាផ្ទះមានបិទស៊ីល ( កំណត់ហេតុបិទទីតាំងបណ្ដោះអាសន្ន) ពាក់ព័ន្ធករណី ជួញដូរគ្រឿងញៀន កាលពីថ្ងៃទី២២ ខែមករា ឆ្នាំ២០២៤ ។
ក្រោយពីបានចម្លើយសារភាពរួច សមត្ថកិច្ចបានសុំគោលការណ៍លោកព្រះរាជអាជ្ញា អមសាលាដំបូងខេត្តដើម្បីធ្វើការឃាត់ខ្លួននិងសួរនាំជនសង្ស័យបន្ត រកបក្សពួកបន្ថែមទៀតដើម្បីចាត់ការបន្តតាមច្បាប់៕
ដោយ៖ សុថាន
