សារព័ត៌មាន នគរវត្ត តែងតែនាំមុខគេជានិច្ច
លោក Jurgen Klinsmann ទំនងជានឹងត្រូវបណ្តេញចេញពីតំណែងជាគ្រូបង្វឹក បន្ទាប់ពីមន្ត្រីបាល់ទាត់កំពូលរបស់កូរ៉េខាងត្បូងបាននិយាយកាលពីថ្ងៃព្រហស្បតិ៍ទី១៥ ខែកុម្ភៈថា “ការផ្លាស់ប្តូរភាពជាអ្នកដឹកនាំគឺចាំបាច់” បន្ទាប់ពីការធ្លាក់ចេញពី Asian Cup របស់ពួកគេ និងការប្រយុទ្ធគ្នាក្នុងចំណោមកីឡាករល្បីៗ។
គណៈកម្មាធិការជាតិរបស់សមាគមកីឡាបាល់ទាត់កូរ៉េបានជួបប្រជុំគ្នាមួយសប្តាហ៍ពីការចាញ់ហ្ស៊កដានី ២–០ ក្នុងវគ្គពាក់កណ្តាលផ្តាច់ព្រ័ត្រ និងជាមួយ Klinsmann ក្រោមសម្ពាធដ៏ធំ។ គណៈកម្មាធិការនេះមិនមែនជាស្ថាប័នធ្វើសេចក្តីសម្រេចចិត្តទេ ប៉ុន្តែនឹងផ្តល់អនុសាសន៍របស់ខ្លួនទៅកាន់ក្រុមប្រឹក្សាប្រតិបត្តិរបស់ KFA ដែលនឹងធ្វើការសម្រេចចុងក្រោយលើជោគវាសនារបស់គ្រូបង្វឹកសញ្ជាតិអាល្លឺម៉ង់វ័យ៥៩ឆ្នាំរូបនេះ។
ក្រុមបាតុករបានប្រមូលផ្តុំគ្នានៅខាងក្រៅទីស្នាក់ការកណ្តាល KFA ក្នុងទីក្រុងសេអ៊ូល ដោយទាមទារឱ្យដកលោក Klinsmann ចេញពីតំណែង បន្ទាប់ពីបានកាន់តំណែងតិចជាងមួយឆ្នាំ។ Hwangbo Kwan នៃគណៈកម្មាធិការបាននិយាយថា “យើងបានឈានដល់ការយល់ស្របមួយដែលលោក Klinsmann មិនអាចអនុវត្តការដឹកនាំរបស់គាត់ក្នុងនាមជាគ្រូបង្វឹកក្រុមជម្រើសជាតិសម្រាប់ហេតុផលផ្សេងៗ ហើយថាការផ្លាស់ប្តូរភាពជាអ្នកដឹកនាំគឺជាការចាំបាច់” ។
បន្ទាប់ពីកិច្ចប្រជុំរយៈពេល៣ម៉ោង លោក Hwangbo បាននិយាយថា គណៈកម្មាធិការបានសម្រេចចិត្តថា “ការរៀបចំយុទ្ធសាស្ត្ររបស់លោកKlinsmann បានធ្លាក់ចុះ” ក្នុងអំឡុងពេលយុទ្ធនាការ Asian Cup ដ៏ខកចិត្តរបស់ក្រុមនៅក្នុងប្រទេសកាតា។
លោកបានបន្ថែមថា “Klinsmann បាននិយាយថាមានការមិនចុះសម្រុងគ្នាក្នុងចំណោមសមាជិកក្រុម ហើយវាប៉ះពាល់ដល់ការសម្តែងរបស់ពួកគេ (នៅក្នុងការប្រកួតជាមួយហ្ស៊កដានី)”។ លោក Klinsmann ក៏បានចូលរួមកិច្ចប្រជុំនេះនៅក្នុងសន្និសីទវីដេអូមួយពីផ្ទះរបស់គាត់នៅសហរដ្ឋអាមេរិក។
KFA នឹងពិចារណាការតែងតាំងបណ្តោះអាសន្នសម្រាប់ការប្រកួតជម្រុះ World Cup នៅខែក្រោយជាមួយប្រទេសថៃប្រសិនបើលោក Klinsmann ត្រូវបានបណ្តេញចេញ។ លោក Klinsmann ដែលមិនធ្លាប់ឈ្នះលើអ្នកគាំទ្រ ឬប្រព័ន្ធផ្សព្វផ្សាយរបស់កូរ៉េខាងត្បូង បានសន្យាថានឹងផ្តល់ជើងឯកអាស៊ីជាលើកដំបូងរបស់ប្រទេសនេះក្នុងរយៈពេល៦៤ឆ្នាំ។
លោកបានបដិសេធមិនលាលែងពីតំណែង បើទោះបីជាមានសម្ពាធយ៉ាងខ្លាំងក្លា ហើយបាននិយាយថា លោកនឹងបន្តរស់នៅក្នុងសហរដ្ឋអាមេរិក បើទោះបីជាមានការទាមទារពីអ្នកគាំទ្រ និងប្រព័ន្ធផ្សព្វផ្សាយកូរ៉េខាងត្បូង ឱ្យលោកផ្លាស់ទៅទីនោះក៏ដោយ៕
ដោយ៖ ភារៈ(រូបភាព ៖ Reuters/CNA)
