សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លំនៅឋានធ្វើពីឈើប្រក់ស័ង្កសីសង់ជាប់ៗគ្នា នៅក្រោយរបងម៉ុងឌីយ៉ាល់ក្នុងសង្កាត់ផ្សារដើមគ ខណ្ឌទួលគោក ត្រូវបានអគ្គិភ័យឆាបឆេះយ៉ាងសន្ធោសន្ធៅ បណ្តាលអោយផ្ទះចំនួន៥ខ្នងរងការខូចខាតអស់ទាំងស្រុង។
ហេតុការណ៍នេះបានកើតឡើងកាលពីវេលាម៉ោង ៤និង១០នាទីរសៀល ថ្ងៃទី០៦ ខែមីនា ឆ្នាំ២០២៤នេះ ហើយរថយន្តពន្លត់អគ្គីភ័យជាច្រើនគ្រឿងបានទៅធ្វើអន្តរាគមន៍បាញ់ពន្លត់។
តាមប្រភពបានអោយដឹងថា នៅមុនពេលកើតហេតុ គេឃើញភ្លើងបានឆាបឆេះចេញពីជាន់ទី១នៃផ្ទះឈើមួយខ្នងដែលម្ចាស់បិទទ្វារទុកចោល ហើយបានឆេះរាលដាលយ៉ាងរហ័សទៅផ្ទះផ្សេងទៀត ដែលនៅជាប់នោះយ៉ាងសន្ធោសន្ធៅ ។ភ្លាមៗ បង្កអោយមានការភ្ញាក់ផ្អើលដល់ប្រជាពលរដ្ឋនាំគ្នាជញ្ជូនអីវ៉ាន់ចេញនិងទាក់ទងទៅរថយន្តពន្លត់អគ្គិភ័យទៅធ្វើអន្តរាគមន៍។
តាមនគរបាលការិយាល័យបង្ការពន្លត់អគ្គិភ័យនិងសង្គ្រោះនៃស្នងការដ្ឋាននគរបាលរាជធានីភ្នំពេញបានអោយដឹងថា នៅក្នុងហេតុការណ៍នេះ រថយន្តពន្លត់អគ្គិភ័យប្រមាណជិត២០គ្រឿងបានទៅអន្តរាគមន៍បាញ់ពន្លត់។
តាមនគរបាលបានអោយដឹងទៀតថា ផ្ទះដែលត្រូវភ្លើងឆេះជាប្រភេផ្ទះធ្វើពីឈើលើថ្មក្រោម ប្រក់ស័ង្កសី ដែលបានសង់ជាប់ៗគ្នា តាមផ្លូវឌឿងហែម ។ អគ្គិភ័យនេះបានបំផ្លាញផ្ទះអស់៥ខ្នងទាំងស្រុង រួមជាមួយសម្ភារះមួយចំនួនទៀត ។ទាក់ទិនការកើតមានអគ្គិភ័យនេះ សមត្ថកិច្ចពុំទាន់ដឹងពីមូលហេតុអ្វីនៅឡើយ កំពុងតែ ស្រាវជ្រាវ ។ទោះបីជាយ៉ាងណាគេមានការសង្ស័យថា បណ្តាលមកពីឆ្លងចរន្តអគ្គិសនី៕
ដោយ៖ រ៉ារ៉ា
