សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យ៉ាងហោចណាស់ក៏មានក្មេងស្រីសិស្សសាលាម្នាក់បានធ្លាយខួរស្លាប់ភ្លាមៗយ៉ាងអាណោចអាធ័ម និងមនុស្សប្រុសស្រី៣នាក់ទៀតរងរបួសធ្ងន់ស្រាលក្នុងគ្រោះថ្នាក់ចរាចរណ៍បង្កឡេីងដោយរថយន្តឃ្លុបបេីកលឿនវ៉ាជែងចូលគន្លងបញ្ច្រាសជ្រុលទៅបុកកិនម៉ូតូនិងឡំប្រឺតា កាលពីវេលាម៉ោង១២និង២០នាទីថ្ងៃត្រង់ ថ្ងៃទី៩ មីនា ឆ្នាំ២០២៤ នៅចំណុចមុខខ្លោងទ្វារវត្តអរុណវតី តាមបណ្តោយផ្លូវជាតិលេខ៤ ក្នុងភូមិកន្ទោកជេីង សង្កាត់កន្ទោក ខណ្ឌកំបូល ហេីយរថយន្តបង្កព្យាយាមបេីករត់បានប្រហែល១០០ម៉ែត្រទេីបឃាត់ខ្លួនបានទាំងតៃកុង។ជនរងគ្រោះ ឈ្មោះផន ស្រីនុច ១២ឆ្នាំ (សព) និង ផន ស្រីនាង ៩ឆ្នាំ(របួស) ជាសិស្សសាលា។ ដោយឡែកបុរស២នាក់ទៀតទី១-ឈ្មោះ ជុំ ចាន់វាសនា ភេទប្រុស អាយុ២៨ឆ្នាំ រងរបួសស្រាល បេីកបរឡំប្រឺតា ស្នាក់នៅភូមិវាល សង្កាត់ត្រពាំងក្រសាំង ខណ្ឌពោធិ៍សែនជ័យ ចំណែកម្នាក់ទៀតរងរបួសបាក់ជេីងទាំងសងខាង ឈ្មោះប៉ុន វិសាល ភេទប្រុស អាយុ៣០ឆ្នាំ បេីកបរម៉ូតូម៉ាកគុប ពណ៌ខៀវ ពាក់ស្លាកលេខបន្ទាយមានជ័យ1S-0512 ។តាមប្រភពព័ត៌មានបានឱ្យដឹងថា មុនពេលកេីតហេតុគេបានឃេីញជនរងគ្រោះឈ្មោះប៉ុន វិសាល ជិះម៉ូតូដឹកក្មេងស្រី២នាក់ធ្វេីដំណេីរតាមបណ្តោយផ្លូវជាតិលេខ៤ក្នុងទិសដៅពីលិចទៅកេីត ដោយមានឡំប្រឺតាមួយគ្រឿងទៀតបេីកបរដោយបុរសម្នាក់ធ្វេីដំណេីរស្របគ្នាមកពីក្រោយ លុះមកដល់ចំណុចកេីតហេតុស្រាប់តែមានរថយន្តឃ្លុប ពាក់ស្លាកលេខភ្នំពេញ3E-2791 ធ្វេីដំណេីរក្នុងទិសដៅពីកេីតទៅលិចក្នុងល្បឿនលឿនហេីយវ៉ាជែងចូលគន្លងបញ្ច្រាសខាងម៉ូតូក៏ជ្រុលទៅបុកកិនម៉ូតូបណ្តាលឱ្យក្មេងស្រីម្នាក់បែកក្បាលធ្លាយខួរស្លាប់ភ្លាមៗ ចំណែកបុរសអ្នកឌុបនិងក្មេងស្រីម្នាក់ទៀតរងរបួសធ្ងន់ ហេីយរថយន្តមិនទាន់អស់ល្បឿនក៏បន្តទៅបុកឡំប្រឺតាមួយគ្រឿងទៀតបណ្តាលឱ្យបុរសម្នាក់រងរបួសស្រាល។
ប្រភពដដែលបានបន្តថា ភ្លាមនោះរថយន្តបង្កមិនព្រមឈប់ទទួលកំហុសនោះទេបានព្យាយាមបេីករត់បានប្រហែល១០០ម៉ែត្រត្រូវបានប្រជាពលរដ្ឋដេញឃាត់ជាប់។
ក្រោយកេីតហេតុជនរងគ្រោះដែលរងរបួសត្រូវបានកងសង្គ្រោះ៧១១ កងពលតូចលេខ៧០ ដឹកបញ្ជូនទៅមន្ទីរពេទ្យព្រះកុសុមៈ ដេីម្បីសង្គ្រោះ ចំណែកម៉ូតូនិងរថយន្តរួមទាំងតៃកុងត្រូវបានសមត្ថកិច្ចមូលដ្ឋានទាក់ទងទៅជំនាញចរាចរណ៍រាជធានីភ្នំពេញដេីម្បីចុះមកធ្វេីការវាស់វែងយកយានយន្តទាំងអស់ទៅរក្សាទុករងចាំដោះស្រាយតាមនីតិវិធី៕
ដោយ៖សុខាសែនជ័យ
