សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យោងតាមរបាយការណ៍របស់សមត្ថកិច្ចនគរបាលខណ្ឌឬស្សីកែវនាព្រឹកថ្ងៃទី១៦ ខែមីនា ឆ្នាំ២០២៤ បានឲ្យដឹងថា មានករណីហិង្សាដោយចេតនា បុរសម្នាក់( ប្រើដុំថ្មគប់លើជនរងគ្រោះ ) កាលម៉ោង១២និង១៥នាទីរសៀល ថ្ងៃទី១៥ ខែមីនា ឆ្នាំ២០២៤ នៅចំណុចមុខហាងមីស អយ ស្ទ័រ ផ្លូវភ្លោះហ្រ្គែនភ្នំពេញ ក្រុម៨ ភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ ហើយត្រូវបានសមត្ថកិច្ចឃាត់ខ្លួនបាន។
លោកហ៊ាង ថារ៉េត អធិការនគរបាលខណ្ឌឬស្សីកែវបានឲ្យដឹងថា ជនរងគ្រោះមានឈ្មោះ ឈាង អឺ ភេទប្រុស អាយុ២៥ឆ្នាំ ជនជាតិខ្មែរ មុខរបរសន្តិសុខ មានទីលំក្រុមទី៨ ភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ ។
ចំណែកជនសង្ស័យឈ្មោះ រិទ្ធ ប៊ុនថេត ភេទប្រុស អាយុ២៤ឆ្នាំ ជនជាតិខ្មែរ មុខរបរចុងភៅ នៅផ្ទះ មានទីលំនៅក្នុងហាងមីសអយស្ទ័រ ក្រុមទី៨ ភូមិស្វាយប៉ាក សង្កាត់ស្វាយប៉ាក ខណ្ឌឬស្សីកែវ (មានសារធាតុញៀន)។
លោកអធិការបានឲ្យដឹងទៀតថា នៅថ្ងៃកើតហេតុជនរងគ្រោះបានជិះម៉ូតូតែម្នាក់ឯងក្នុងទិសដៅពីកើតទៅលិចលើផ្លូវភ្លោះហ្រ្គែនភ្នំពេញ លុះដល់ចំណុចកើតហេតុជនសង្ស័យបានយកដុំថ្មគប់ទៅលើជនរងគ្រោះតែជនរងគេចផុត ។ក្រោយមកជនរងគ្រោះបានមកដាក់ពាក្យបណ្ដឹងនៅប៉ុស្តិ៍ ស្វាយប៉ាក ពេលទទួលបានពាក្យបណ្ដឹងជនរងគ្រោះរួចកម្លាំងសមត្ថកិច្ចខណ្ឌនិងប៉ុស្តិ៍បានកំណត់មុខសញ្ញាឈានដល់ឃាត់ខ្លួនជនសង្ស័យនៅម៉ោង៩:៣០នាទីយប់ថ្ងៃដដែលនៅចំណុចផ្លូវភ្លោះហ្រ្គែន ភូមិស្វាយប៉ាក សង្កាត់ស្វាយប៉ាក ខណ្ឌឬស្សីកែវ យកមកប៉ុស្តិ៍នគរបាលរដ្ឋបាលស្វាយប៉ាកដើម្បីសួរនាំ។
បច្ចុប្បន្នជនសង្ស័យកំពុងឃាត់ខ្លួនបណ្តោះអាសន្ននៅអធិការដ្ឋានគរបាលខណ្ឌឬស្សីកែវ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការបន្តតាមនីតិវិធី៕
ដោយ៖ ជ្រោយពេជ្រ
