សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានលើកទឹកចិត្ដឲ្យពលរដ្ឋយកកូនឱ្យបានច្រើន ដើម្បីបង្កើនចំនួនប្រជាជនវ័យក្មេងបន្ថែមទៀតឱ្យបានច្រើនចៀសវាងបញ្ហាថយចុះនៃកម្លាំងពលកម្ម ក្នុងការចូលរួមអភិវឌ្ឍប្រទេសជាតិ។
ការលើកឡើងខាងលើរបស់សម្ដេចធិបតី ហ៊ុន ម៉ាណែត ធ្វើឡើងក្នុងពេលដែលសម្ដេចអញ្ជើញជាអធិបតីដ៏ខ្ពង់ខ្ពស់បិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងផែនការ នៅព្រឹកថ្ងៃទី៩ ខែមេសា ឆ្នាំ២០២៤។
សម្ដេចធិបតី ហ៊ុន ម៉ាណែត បានលើកឡើងបន្តថា ៖ គោលនយោបាយជាតិ ប្រជាជនឆ្នាំ២០១៦-២០៣០ គឺឈរលើគោលការណ៍ទទួលស្គាល់និងគាំទ្រចំពោះសិទ្ធិរបស់គូស្វាមីភរិយា និងបុគ្គលទាំងអស់ឱ្យមានសិទ្ធិជាមូលដ្ឋាននៅក្នុងការសម្រេចចិត្ដដោយសេរី និងទទួលខុសត្រូវលើចំនួនកូន និងការពន្យាកំណើត ដោយពួកគាត់មានលទ្ធភាពទទួលបានព័ត៌មានអំពី សេវា មធ្យោបាយ និងការសម្រេចចិត្ដ។
ជាមួយគ្នានោះដែរ សម្ដេចធិបតីបានលើកទឹកចិត្ដដល់គូស្វាមីភរិយាដែលមានលទ្ធភាពសេដ្ឋកិច្ច គួរមានកូនច្រើនលើសពីចំនួនកំណត់ ដើម្បីចៀសវាងហានិភ័យពីកង្វះពលកម្ម។
សម្ដេចធិបតី បានបន្ដថា ៖ តាមជំរឿននៅឆ្នាំ២០៥០ ចំនួនពលរដ្ឋវ័យចាស់គឺមានច្រើនជាងអ្នកមានវ័យតិចជាង១៥ឆ្នាំ ហើយអ្នកអាយុកណ្ដាលគឺជាធាតុផ្សំ ដោយហេតុថា បន្ដិចទៀតក្មេងអាយុ១៥ឆ្នាំ នឹងឡើងមកដល់វ័យកណ្ដាល ហើយមនុស្សវ័យកណ្ដាលនឹងឡើងដល់វ័យចំណាស់។
បច្ចុប្បន្ន យើងមានអ្នកអាយុវ័យកណ្ដាលច្រើននៅឡើយ ប៉ុន្ដែបើចំនួនអ្នកកើតមានចំនួនតិចជាងអ្នកចាស់ នោះមិនយូរទេយើងនឹងមានបញ្ហាមិនខាន ដែលជាក់ស្ដែងប្រទេសជិតខាងរបស់យើងកំពុងតែជួបបញ្ហានេះបណ្ដើរៗហើយ។
ទន្ទឹមនឹងនេះ សម្ដេចធិបតី បានមានប្រសាសន៍ថា បើទោះបីជានៅឆ្នាំ២០៥០ យើងនៅមានមនុស្សវ័យកណ្ដាលច្រើនក៏ដោយ ប៉ុន្ដ ៖
១- ប្រទេសកម្ពុជារបស់យើង ទោះជាតូចមិនទាន់ធំក៏ដោយ ប៉ុន្ដែប្រទេសរបស់យើងនៅសល់សក្ដានុពលច្រើនណាស់
២- ការថយចុះនៃភាគរយរបស់មនុស្សវ័យក្មេង និងមនុស្សចាស់ក៏ជាបញ្ហាចោទ។ ឥឡូវនេះ យើងនាំចេញកម្លាំងពលកម្មទៅក្រៅប្រទេសច្រើន ខណៈពេលដែលប្រទេសមួយចំនួនបាននិងកំពុងខ្វះកម្លាំងពលកម្ម។
សម្ដេចបានបន្ដថា ៖ នៅក្នុងឆ្នាំ២០៥០ យើងចាប់ផ្ដើមមើលឃើញជាបណ្ដើរៗនូវការថយចុះកម្លាំងពលកម្ម ពោលបើទោះបីជាការព្យាករដោយផ្អែកទៅលើទិន្នន័យនៃការធ្វើជំរឿននេះមិនទាន់មានបញ្ហាចោទនៅឆ្នាំ២០៥០ ក្ដី ប៉ុន្ដែយើងបានមើលឃើញនូវសញ្ញានៃការថយចុះ គម្លាតរវាងអ្នកដែលមានអាយុចាស់លើសកម្លាំង និងអ្នកដែលមានអាយុវ័យកណ្ដាលចាប់ផ្ដើមកើនឡើងហើយ។
លោក ឆាយ សុផល រដ្ឋលេខាធិការ ក្រសួងព័ត៌មាន ពាក់ព័ន្ធនឹងការលើកទឹកចិត្ដឲ្យពលរដ្ឋយកកូនឱ្យបានច្រើន ដើម្បីបង្កើនប្រជាជនវ័យក្មេងបន្ថែមទៀត ។ លោកបានបង្ហោះលើផេកផ្ទាល់ខ្លួនថា ៖ ហេតុផលខ្លះដែលនាំឱ្យអត្រាធ្លាក់ចុះនៃចំនួនមនុស្ស នៅក្នុងពិភពលោក៖
១. ស្ត្រីមានសិទ្ធិកាន់តែខ្ពស់នៅក្នុងគ្រួសារ និងសង្គម ដែលធ្វើឱ្យពួកគេសម្រេចចិត្តថា យកកូន ឬមិនយក។
២. សេដ្ឋកិច្ចមិនអំណោយផលនៅក្នុងគ្រួសារ។
៣. ប្តីប្រពន្ធជំនាន់ថ្មីមិនចង់ចិញ្ចឹមកូនច្រើន ដើម្បីឱ្យជីវិតពួកគេមានឱកាសច្រើន ខណៈអ្នកខ្លះមិនរៀបការ និងមិនយកកូន។
៤. ប្រទេសខ្លះបានដាក់គោលនយោបាយឱ្យប្រជាជនយកកូនតិច ដោយហេតុផលផ្សេងៗ។
៥. ប្រទេសខ្លះមានសង្រ្គាម កើតកលិយុគ ដែលនាំឱ្យប្តីប្រពន្ធមិនយកកូន។
សម្តេចធិបតីបានបញ្ជាក់ដូច្នេះថា «ខ្ញុំក៏សុំលើកទឹកចិត្តដល់គូស្វាមីភរិយា ដែលមានលទ្ធភាពសេដ្ឋកិច្ច គួរមានកូនច្រើន លើកពីចំនួនកំណត់ ដើម្បីជៀសវាងនូវហានិភ័យកង្វះកម្លាំងពលកម្ម។ យើងឃើញហើយថា នៅឆ្នាំ២០៥០ ចំនួនប្រជាជនដែលមានវ័យចាស់ គឺច្រើនជាងអ្នកទាប។ ឥឡូវនេះយើងមានអត្រាមនុស្សវ័យកណ្តាល មានកម្រិតធំនៅឡើយ ប៉ុន្តែបើសិនជាចំនួនអ្នកកើត កាន់តែតិចជាងចំនួនអ្នកចាស់ យើងមិនយូរមិនឆាប់អាចខ្វះកម្លាំងពលកម្ម ហើយនៅប្រទេសជិតខាងរបស់យើងមានបញ្ហានេះ»។
សម្តេចបានបញ្ជាក់ថា «បើទោះបីទិន្នន័យជំរឿនបង្ហាញថាកម្ពុជា មិនទាន់មានបញ្ហាចោទនៅឆ្នាំ២០៥០ ចំពោះការខ្វះកម្លាំងពលកម្មក្តី ប៉ុន្តែយើងមានឃើញសញ្ញានៃការថយចុះ រវាងគម្លាតអ្នកដែលមានអាយុចាស់ និងអ្នកដែលពេញកម្លាំង គឺចាប់ផ្តើមកើន ហើយប្រសិនបើអត្រាកំណើតកាន់តែថយ យើងនឹងអាចមានបញ្ហាប្រឈម។ ហើយមានកូនឥឡូវ ស្រួលជាងមានកូនឆ្នាំ២០៥០» ៕
ដោយ ៖ សិលា
