សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រសួងបរិស្ថាន នៅព្រឹកថ្ងៃទី១០ ខែមេសា ឆ្នាំ២០២៤នេះ បានឱ្យដឹងថា ស្វាកន្ទុយស មានឆោសស្រស់ស្អាត និងរស់នៅដែនជម្រកសត្វព្រៃលំផាត់ក្នុងខេត្តរតនគិរី និងមណ្ឌលគិរី។
ក្រសួងបរិស្ថាន បានបន្ថែមថា ស្វាកន្ទុយស ជាប្រភេទពានរដែលមានពណ៌សម្បុរស្រស់ស្អាត ដោយមានលក្ខណៈខុសប្លែកពីប្រភេទស្វាដទៃទៀត។ នៅកម្ពុជាដែនជម្រកសត្វព្រៃលំផាត់ក្នុងខេត្តរតនគិរី និងមណ្ឌលគិរី គឺជាទីតាំងដ៏សំខាន់មួយដែលបានគាំទ្រដល់ការរស់នៅរបស់សត្វស្វាកន្ទុយស។
គួរបញ្ជាក់ថា ស្វាកន្ទុយសគឺជាប្រភេទជិតផុតពូជបំផុតអាស្រ័យចំនួនវាមានការចុះជាលំដាប់។ការបរបាញ់ និងការបាត់បង់ទីជម្រកគឺជាកត្តាប្រឈមចម្បងរបស់អំបូរពានរនេះ។
គួរជម្រាបជូនថា អង្គការអេកូយុវទួត Wonders of the Mekong កន្លងទៅធ្លាប់បានផ្សាយព័ត៌មានផ្លូវការរបស់ខ្លួនថា សត្វស្វាកន្ទុយស ដែលស្ថិតនៅក្នុងប្រភេទសត្វកំពុងរងគ្រោះថ្នាក់ ត្រូវបានរកឃើញនៅតាមប្រទេសឡាវ វៀតណាម និង ប្រទេសកម្ពុជា។
ក្នុងនោះដែនជម្រកសត្វព្រៃកែវសីមា ខេត្តមណ្ឌលគីរី ជាទីតាំងដែលសត្វស្វាប្រភេទនេះរស់នៅច្រើនជាងគេ នៅក្នុងប្រទេសកម្ពុជា ដែលធ្វើការអភិរក្សដោយអង្គការ WCS Cambodia ។ ប្រភេទសត្វពានរនេះ ធ្វើការរស់នៅជាក្រុមតាមដើមឈើខ្ពស់ៗ នៅក្នុងព្រៃស្រោង និង ព្រៃពាក់កណ្តាលស្រោង។
អង្គការ អេកូយុវទូតWonders of the Mekong បានបញ្ជាក់ទៀតថា សត្វស្វាកន្ទុយស នេះនៅពេលដែលមានអាសន្ន ឬក៏ការគំរាមកំហែងកើតឡើង វាតែងតែបន្លឺសំឡេងជាសញ្ញា ឱ្យគ្នាវាគេចរកន្លែងសម្ងំលាក់ខ្លួននៅលើចុងឈើខ្ពស់ៗ ៕
ដោយ៖ តារា
