សប្តាហ៍ក្រោយ ប្រធានាធិបតីចិន លោក ស៉ី ជីនពីង នឹងបំពេញទស្សនកិច្ចទៅកាន់ប្រទេសបារាំង

ចែករំលែក៖

សារព័ត៌មាន AFP នាថ្ងៃចន្ទ ទី២៩ ខែមេសា ឆ្នាំ២០២៤ ទីក្រុងប៉ារីសបានប្រកាសឱ្យដឹងនៅថ្ងៃចន្ទនេះថា ប្រធានាធិបតីចិន លោក ស៉ី ជីនពីង នឹងមកបំពេញទស្សនកិច្ចផ្លូវរដ្ឋក្នុងប្រទេសបារាំងនៅថ្ងៃទី៦ និងទី៧ ខែឧសភា ដោយបញ្ហាអ៊ុយក្រែននិងមជ្ឈិមបូព៌ា ត្រូវគេរំពឹងថា ស្ថិតនៅអាទិភាពខ្ពស់ក្នុងរបៀបវារៈ។
ការិយាល័យប្រធានាធិបតីបារាំង លោក Emmanuel Macron បាននិយាយក្នុងសេចក្តីថ្លែងការណ៍ថា ដំណើរទស្សនកិច្ចរបស់លោក ស៉ី គឺធ្វើឡើងក្នុងឱកាសខួបទី៦០ នៃទំនាក់ទំនងការទូតរវាងប្រទេសទាំងពីរ និងក្រោយពេលលោក Macron បានទៅបំពេញទស្សនកិច្ចនៅឯទីក្រុងប៉េកាំង កាលពីខែមេសា ឆ្នាំ២០២៣។ វាគឺជាទស្សនកិច្ចដំបូងបំផុតរបស់លោក ស៉ី មកកាន់តំបន់អឺរ៉ុប គិតចាប់តាំងពីការរីករាលដាលនៃជំងឺរាតត្បាតសកលកូវីដ-១៩។
យោងតាមការិយាល័យ Elysee កិច្ចពិភាក្សារវាងលោក ស៉ី និងលោក Macron គឺនឹងផ្តោតទៅលើវិបត្តិអន្តរជាតិ ជាពិសេសសង្រ្គាមនៅអ៊ុយក្រែន ព្រមទាំងស្ថានការណ៍នៅមជ្ឈិមបូព៌ា ក៏ដូចជាបញ្ហាការធ្វើពាណិជ្ជកម្មទ្វេភាគី រួមទាំងកិច្ចសហប្រតិបត្តិការផ្នែកវិទ្យាសាស្រ្ត វប្បធម៌ និងកីឡា។ ដោយឡែក បើតាមក្រសួងការបរទេសចិន ក្រៅពីប្រទេសបារាំង លោកប្រធានាធិបតីចិន ក៏នឹងឆ្លៀតចូលបំពេញទស្សនកិច្ចនៅឯប្រទេសស៊ែប៊ីនិងហុងគ្រី ផងដែរ៕ ដោយ៖ ធីរីណា