សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នារីម្នាក់បានបេីករថយន្តស៊េរីទំនើបBMWក្នុងល្បឿនលឿន ហេីយជ្រុលទៅបុុក និងម៉ូតូ០២គ្រឿងបណ្ដាលឲ្យមនុស្សម្នាក់រងរបួសធ្ងន់ និង០២នាក់ទៀតរងរបួសស្រាល បង្កការភ្ញាក់ផ្អេីលដល់អ្នកដំណេីរកាលពីវេលា ម៉ោង ០១និង២០នាទីរំលងអធ្រាត្រឈានចូល ថ្ងៃទី១២ ខែកញ្ញា ឆ្នាំ២០២៤ ចំណុចផ្លូវ២៨២ កែង ផ្លូវ ៥៧ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ។
បេីតាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកេីតហេតុគេឃើញម៉ូតូ ចំនួន០២គ្រឿងរួមមាន ៖ ម៉ូតូម៉ាកហុងដាឌ្រីម ស៊េរីឆ្នាំ២០២៣ ពណ៌ខ្មៅ ពាក់ផ្លាកលេខ ភ្នំពេញ1KN-4626 ជិះគ្នា០២នាក់ ប្រុសម្នាក់ និង ស្រីម្នាក់ ។ ចំណែកម៉ូតូមួយគ្រឿងទៀត ម៉ាកហុងដាស្កុបពី ពណ៌សំបកឪឡឹក ពាក់ផ្លាកលេខ តាកែវ 1Z -7776 ជិះដោយបុរសម្នាក់ ដោយម៉ូតូទាំង០២គ្រឿងខាងលេីបានធ្វេីដំណេីរទន្ទឹមគ្នាតាមបណ្ដោយផ្លូវ៥៧ ទិសដៅពី ត្បូងទៅជេីង ។ ខណៈធ្វេីដំណេីរមកដល់ចំណុចកេីតហេតុដែលជាផ្លូវបំបែកជាបួនក៏ស្រាប់តែនារីម្នាក់រួមដំណើរជាមួយនិងបុរស៣នាក់បានបេីករថយន្តស៊េរីទំនើបម៉ាកBMW i8 ពណ៌ ស ពាក់ផ្លាកលេខ កម្ពុជា LM.8878 បានធ្វើ ដំណើរតាមបណ្ដោយផ្លូវ២៨២ទិសដៅពីកេីត ទៅលិចក្នុងល្បឿនលឿន ដោយមិនប្រុងប្រយ័ត្នក៏ជ្រុលទៅបុុក និងម៉ូតូទាំង០២គ្រឿង យ៉ាងពេញទំហឹង បណ្តាលឲ្យម៉ូតូទាំង០២គ្រឿងខ្ទាតទៅចិញ្ចេីមផ្លូវរងការ ខូចខាត ព្រមទាំងធ្វើឱ្យនារីម្នាក់រងរបួសបាក់ជើង ខាងស្តាំធ្ងន់ធ្ងរ រីឯបុរស២នាក់ទៀតរងរបួស រលាត់ដៃជើងតិចតួច ខណៈ អ្នកទាំង៣ត្រូវ បានដឹកតាមរថយន្តសាមុយយកទៅសង្គ្រោះ នៅមន្ទីរពេទ្យកាល់ម៉ែត្រ ។
ចំណែកភាគីខាងរថយន្តបង្កវិញ ក៏បានរងការខូចខាតខ្ទេចផែ្នកខាងមុខបែកកញ្ចក់ អ្នកបេីកបរជានារី ត្រូវបានសមត្ថកិច្ចឃាត់ខ្លួនយកទៅ សួរនាំនៅប៉ុស្តិ៍នគរបាលរដ្ឋបាល បឹងកេងកងទី ១ រង់ចាំប្រគល់ឲ្យនគរបាលជំនាញចរាចរណ៍ចាត់ការបន្ត ។
ក្រោយកេីតហេតុ សមត្ថកិច្ចមូលដ្ឋាន បានសហការជាមួយជំនាញចរាចរណ៍ ធ្វេីការវាស់វែងយករថយន្តបង្ក និងម៉ូតូរងគ្រោះទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំ ដំណោះស្រាយគ្នាបន្តតាមក្រោយ ៕
ដោយ ៖ ភារ៉ា ដង្កោ
