🔥បើកធុងហ្គាសធំបញ្ចូលទៅធុងហ្គាសតូចផ្ទុះឡើងបង្កជាអគ្គិភ័យឆាបឆេះផ្ទះមួយខ្នង

ខេត្តពោធិ៍សាត់៖ បើកធុងហ្គាសធំបញ្ចូលទៅធុងហ្គាសតូចផ្ទុះឡើងបង្កជាអគ្គិភ័យឆាបឆេះផ្ទះមួយខ្នងទំហំ ទទឹង 7.5ម៉ែត្រនិងបណ្ដោយ 21ម៉ែត្រ ធ្វើពីថ្មប្រក់ស័ង្កសី រួមនឹងសម្ភារៈទ្រព្យសម្បត្តិមួយចំនួនស្ទើរទាំងស្រុង។

ហេតុការណ៍គ្រោះអគ្គិភ័យនេះកើតឡើងកាលពីយប់ថ្ងៃទី១៣ ខែតុលា ឆ្នាំ២០២៤ នៅចំណុចជាប់ស្ថានីយប្រេងឥន្ធនៈpapa ក្នុងភូមិស្ថានីយ សង្កាត់ស្វាយអាត់ ក្រុងពោធិ៍សាត់។

សមត្ថកិច្ចបញ្ជាក់ឱ្យដឹងថា ម្ចាស់ផ្ទះរងគ្រោះឈ្មោះយ៉ុង ខេង ភេទប្រុស អាយុ 64 ឆ្នាំ មានមុខរបរអាជីវកម្មបញ្ចូលហ្គាស រស់នៅក្នុងភូមិកើតហេតុខាងលើ។

សមត្ថកិច្ចបញ្ជាក់បន្ថែមថា គ្រោះអគ្គិភ័យនេះកើតឡើងដោយសារតែកូនម្ចាស់ផ្ទះបើកធុងហ្គាសធំបញ្ចូលទៅធុងហ្គាសតូចទើបបណ្ដាលឱ្យផ្ទុះកើតចេញជាអណ្ដាតភ្លើងឆេះរាលដាលផ្ទុះធុងហ្គាសជាច្រើនឆាបឆេះផ្ទះនិងសម្ភារៈទ្រព្យសម្បត្តិនៅក្នុងនោះមួយចំនួនអស់ស្ទើរតែទាំងស្រុង រួមមាន៖ ម៉ូតូចំនួនពីរគ្រឿង ទូឈើចំនួន 3 តុបាយ1 សាឡុងធំ1ឈុត សាឡុងតូច1ឈុត គ្រែ០១ ហង្សតេចំនួន០១និងសម្ភារៈផ្សេងៗមួយចំនួនទៀតផងដែរ ប៉ុន្តែមិនមានមនុស្សណាម្នាក់រករបួសឡើយ។

នៅក្នុងហេតុការណ៍គ្រោះថ្នាក់អគ្គិភ័យនេះគេឃើញវត្តមានលោកខូយ រីដា អភិបាលខេត្តពោធិ៍សាត់ បានចុះដល់កន្លែងកើតហេតុ ជាមួយនឹងក្រុមរថយន្តពន្លត់អគ្គិភ័យជួយអន្តរាគមន៍បាញ់ទឹកពន្លត់ដោយប្រើប្រាស់ទឹកអស់2 រថយន្តទើបភ្លើងរលត់ទៅវិញមិនរាលដាលដល់ផ្ទះអ្នកជិតខាង៕

ដោយ៖ ជ្រោយពេជ្រ