ឃាត់ខ្លួនជនសង្ស័យ០២នាក់ ខណៈប្រើកាំបិតខ្វែវ និងកាំបិតបុ័ងតោ ដេញកាប់ជនរងគ្រោះ០២នាក់ និងកាប់ម៉ូតូពីរគ្រឿងបណ្ដាលឱ្យខូចខាតយ៉ាងដំណំ

ចែករំលែក៖

ភ្នំពេញ៖ លោកវរសេនីយ៍ឯក ស៉ឹម ពិសិដ្ឋ អធិការនគរបាលខណ្ឌទួលគោក បានឱ្យដឹងនៅរសៀលថ្ងៃទី២៧ ខែតុលា ឆ្នាំ២០២៤នេះថា កម្លាំងសមត្ថកិច្ចមូលដ្ឋាន បានឃាត់ខ្លួនជនសង្ស័យ ០២នាក់ជាក់ស្ដែង ពីបទហិង្សាដោយចេតនា និងធ្វើឲ្យខូចខាតដោយចេតនា(ក្រុមក្មេងទំនើង០១ក្រុមមានគ្នាប្រហែល២០នាក់កាន់កាំបិតខ្វែវ១ដើមនិងកាំបិតបុ័ងតោ១ដើមដេញកាប់ជនរងគ្រោះ០២នាក់ និងកាប់ម៉ូតូជនរងគ្រោះបណ្ដាលឲ្យខូចខាតម៉ូតូ០២គ្រឿងស្ទើរទាំងស្រុង)កើតហេតុនៅក្នុងមូលដ្ឋានសង្កាត់ទឹកល្អក់ទី៣ ខណ្ឌទួលគោក រាជធានីពេញ ។

លោកវរសេនីយ៍ឯក ស៉ឹម ពិសិដ្ឋ បានឱ្យដឹងទៀតថា កាលពីថ្ងៃទី២៦ ខែតុលា ឆ្នាំ២០២៤ វេលាម៉ោងប្រហែល២០ និង៣០នាទី កម្លាំងប៉ុស្តិ៍នគរបាលរដ្ឋបាលទឹកល្អក់ទី៣ នៃអធិការដ្ឋាននគរបាលខណ្ឌទួលគោក បានធ្វើការឃាត់ខ្លួនជនសង្ស័យ០២នាក់ជាក់ស្ដែងពីបទហិង្សាដោយចេតនា និងធ្វើឲ្យខូចខាតដោយចេតនា(ក្រុមក្មេងទំនើង០១ក្រុមមានគ្នាប្រហែល២០នាក់កាន់កាំបិតខ្វែវ១ដើមនិងកាំបិតបុ័ងតោ១ដើមដេញកាប់ជនរងគ្រោះ០២នាក់និងកាប់ម៉ូតូជនរងគ្រោះបណ្ដាលឲ្យខូចខាតម៉ូតូ០២គ្រឿងស្ទើរទាំងស្រុង) ប្រព្រឹត្តនៅចំណុចមុខផ្ទះ២៧D ផ្លូវលេខ៦៥៦ ក្រុមទី៣២ ភូមិ១២ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ ។

ជនសង្ស័យទី១-ឈ្មោះ ខន សុវណ្ណារាជ ហៅ រាជ ភេទប្រុស អាយុ១៦ឆ្នាំ ជនជាតិខ្មែរ មុខរបរ សិស្សថ្នាក់ទី១០ វិទ្យាល័យ ជាស៊ីម សន្ធរម៉ុក ស្នាក់នៅផ្ទះមិនចាំលេខ ផ្លូវលេខ១២៨ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ ។ និងទី២-ឈ្មោះ សំ ហួរឡាយ ភេទប្រុស អាយុ១៥ឆ្នាំ ជនជាតិខ្មែរ មុខរបរ សិស្សថ្នាក់ទី៩A វិទ្យាល័យបញ្ញាសាស្រ្តា ស្នាក់នៅផ្ទះលេខ៤៩ ផ្លូវលេខ៣៧៩ ភូមិ៣ សង្កាត់បឹងសាឡាង ខណ្ឌទួលគោក រាជធានីភ្នំពេញ ។

វត្ថុតាងចាប់យករួមមាន៖ ១-កាំបិតខ្វែវដងដែកចំនួន០១ (ចាប់យកពីឈ្មោះ ខន សុវណ្ណារាជ ហៅ រាជ) , ទូរស័ព្ទដៃ០១គ្រឿងម៉ាក I phone 11ពណ៌ស ប្រើស៊ីមកាតលេខ និងម៉ូតូ០១គ្រឿងម៉ាក Honda Scoopy ស៊េរី2024 ពាក់ផ្លាកលេខ ភ្នំពេញ 1KU-3390 (ចាប់យកពីឈ្មោះ សំ ហួរឡាយ ) ។

យោងតាមសមត្ថកិច្ចត្រួតពិនិត្យទីកន្លែងកើតហេតុរកឃើញវត្ថុតាងរួមមាន៖ ទូរស័ព្ទដៃ០១គ្រឿងម៉ាក OPPO A55 ពណ៌ខ្មៅ ប្រើស៊ីមកាតលេខ: (ជារបស់ជនសង្ស័យឈ្មោះ ខន សុវណ្ណារាជ ហៅ រាជ ប្រើកាំបិតខ្វែវកាប់លើម៉ូតូរបស់ជនរងគ្រោះរួចជ្រុះនៅកន្លែងកើតហេតុ និងកាំបិតបុ័ងតោបាក់ដងចំនួន០១ (ជារបស់បក្ខពួកជនសង្ស័យខាងលើជ្រុះនៅកន្លែងកើតហេតុពេលធ្វើសកម្មភាពរួច) ។

រីឯជនរងគ្រោះពុំស្គាល់អត្តសញ្ញាណ ភេទប្រុស អាយុប្រហែល២០ឆ្នាំ (ពុំទាន់មកដាក់ពាក្យបណ្ដឹង) ។

សម្ភាររងការខូចខាតមាន៖ ម៉ូតូ០១គ្រឿងម៉ាក Honda Scoopy ពណ៌ខ្មៅ បែកចង្កៀងមុខនិងកុងទ័រ ទាំងស្រុង ។ ម៉ូតូ០១គ្រឿងម៉ាក Suzuki Nex ពណ៌ក្រហម បែកកុងទ័រ និងបែកក្បាំងទាំងស្រុង។

បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្ដោះអាសន្ននៅ អធិការដ្ឋាននគរបាលខណ្ឌទួលគោក ដើម្បីធ្វើការសាកសួរនិងចាត់ការបន្តតាមនីតិវិធី៕