សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យោងតាមរបាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈស្តីពីការរឹតបន្ដឹងច្បាប់ស្ដីពីចរាចរណ៍ផ្លូវគោក នៅថ្ងៃទី១៥ ខែវិច្ឆិកា ឆ្នាំ២០២៤ បានបង្ហាញពីរបាយការណ៍លទ្ធផលត្រួតពិនិត្យការអនុវត្តច្បាប់ចរាចរណ៍ផ្លូវគោក នៅទូទាំងប្រទេសកម្ពុជា រយៈពេល១៥ថ្ងៃ ក្នុងខែវិច្ឆិកានេះ ពោលគឺចាប់ពីថ្ងៃទី១-១៥ ខែវិច្ឆិកា ឆ្នាំ២០២៤ កម្លាំងសមត្ថកិច្ចជំនាញចរាចរណ៍ រកឃើញយានយន្តល្មើសសរុបចំនួន ៤,៣៨១គ្រឿង, រថយន្តធំ ៦៦គ្រឿង, រថយន្តតូច ១,៧៦០គ្រឿង និងម៉ូតូ ២,៥៥៥គ្រឿង ត្រូវបានផាកពិន័យតាមអនុក្រឹត្យលេខ ៣៩.អនក្រ.បក នៅទូទាំងប្រទេស។ ខណៈសមត្ថកិច្ចបានត្រួតពិនិត្យយានយន្ត ចំនួន ៥,៧៥១គ្រឿង, រថយន្តធំ ១២៥គ្រឿង, រថយន្តតូច ២,៤៤០គ្រឿង, ម៉ូតូ ៣,១៨៦គ្រឿង ។
ប្រភពដដែលបន្តថា ជាក់ស្ដែងលទ្ធផលត្រួតពិនិត្យ ការអនុវត្តច្បាប់ចរាចរណ៍ផ្លូវគោក នាថ្ងៃទី១៥ ខែវិច្ឆិកាមេះដែរ កម្លាំងជំនាញ រកឃើញយានយន្តល្មើសចំនួន ៩២គ្រឿងទៀត ត្រូវបានផាកពិន័យតាមអនុក្រឹត្យលេខ៣៩ នៅទូទាំងប្រទេស។
ក្នុងប្រតិបត្តិការនោះ ចំនួនគោលដៅសរុប ១៥១គោលដៅ បានត្រួតពិនិត្យយានយន្ត ចំនួន ៩២គ្រឿង, រថយន្តធំ 0គ្រឿង, រថយន្តតូច ២២គ្រឿង និងម៉ូតូ ៧០គ្រឿង ក្នុងនោះរកឃើញ យានយន្តល្មើសសរុបចំនួន ៥៤គ្រឿង, រថយន្តធំ ០គ្រឿង, រថយន្តតូច ៩គ្រឿង និងម៉ូតូ ៤៥គ្រឿង ត្រូវបានផាកពិន័យតាមអនុក្រឹត្យលេខ ៣៩.អនក្រ.បក នៅទូទាំងប្រទេស ។
របាយការណ៍ដដែល បានវាយតម្លៃថា ការអនុវត្តតាមអនុក្រឹត្យថ្មី ក្នុងការផាកពិន័យយានយន្ត ល្មើសបានដំណើរការទៅយ៉ាងល្អប្រសើរទទួលបានការគាំទ្រ ពិសេសអ្នកប្រើប្រាស់ផ្លូវទាំងអស់ បានចូលរួមគោរពច្បាប់ចរាចរណ៍យ៉ាងល្អប្រសើរ៕
ដោយ៖ តារា
