សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ស្រវឹងខ្លាំងពេកបើករថយន្តទៅប៉ះរ៉ឺម៉កអេតចាយ បែរជាបញ្ចេញកំហឹងវាយតប់គ្នា ជាមួយអ្នកឈរមើលហេតុការណ៍ទៅវិញ បង្កការភ្ញាក់ផ្អើលដល់សមត្ថកិច្ចឃាត់ខ្លួនយកទៅប៉ុស្តិ៍ដេីម្បីសួរនាំ កាលពីវេលាម៉ោង១១និង៤០នាទីយប់ ថ្ងៃទី២០ ខែវិច្ឆិកា ឆ្នាំ២០២៤ ស្ថិតនៅតាមបណ្តោយផ្លូវលេខ១០៥ សង្កាត់បឹងព្រលិត ខណ្ឌ៧មករា រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តម៉ាក Lexus 450 ពណ៌ស្ករ១គ្រឿង ពាក់ផ្លាកលេខ ភ្នំពេញ 2L-7745 បើកបរដោយបុរសម្នាក់ស្ថិតក្នុងស្ថានភាពស្រវឹងស្រាជោកជាំ ដោយម្ចាស់រថយន្តបានបើកបរតាមបណ្តោយផ្លូវ១០៥ ទិសដៅពីជើងទៅត្បូង ទៅប៉ះចំរ៉ឺម៉កអេតចាយ១គ្រឿងដែលចតចោលនៅចិញ្ចើមផ្លូវបណ្តាលឲ្យរងការខូចខាតបន្តិចបន្តួច ។
ប្រភពបានបន្ដទៀតថា ពេលបុករួច បុរសម្នាក់គាត់បានទៅឈរមើលហេតុការណ៍នោះ ដោយឃើញម្ចាស់រថយន្តចុះពីលើរថយន្តរបស់ខ្លួនដោយមិនបានឈ្លោះប្រកែកគ្នាជាមួយភាគីខាងរ៉ឺម៉កទេតែបុរសដែលបើករថយន្ដបង្ក បានមកជេរប្រមាថគាត់ រួចបង្កជម្លោះរហូតឈានដល់ការប្រើហិង្សាជាមួយគាត់ទើបគាត់តដៃវិញ ដោយវាយម្ចាស់រថយន្តនោះឲ្យរបួសតែម្តង ។
ក្រោយពេលកើតហេតុគេឃើញវត្តមានសមត្ថកិច្ចបានចុះមកដល់ រួចក៏បាននាំខ្លួន ភាគីទាំងសងខាងទៅកាន់ប៉ុស្តិ៍នគរបាលរដ្ឋបាល៧មករា ទាំងរថយន្ត និងរ៉ឺម៉ក រួមទាំងពលរដ្ឋឃើញហេតុការណ៍ និងម្ចាស់រថយន្តបង្កខាងលើ ទៅធ្វើការសាកសួរនាំ និងអនុវត្តបន្តតាមនីតិវិធី៕
ដោយ ៖ ភារ៉ា ដង្កោ
