សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ ស្នងការដ្ឋាននគរបាលខេត្ដកំពង់ស្ពឺ នៅព្រឹកថ្ងៃសៅរ៍ទី២៣ ខែវិច្ឆិកា ឆ្នាំ២០២៤នេះ បានឱ្យដឹងថា កម្លាំងសមត្ថកិច្ចនគរបាលខេត្តបានចុះស្រាវជ្រាវឃាត់មុខសញ្ញាក្មេងទំនើង២នាក់ តាមរយៈគណនីហ្វេសប៊ុកមួយដែលបានបង្ហោះអំពីសកម្មភាពក្មេងទំនើងដែលថតរូបបង្អួតកាំបិតផ្គាក់និយាយគំរាមដល់ភាគីម្ខាងទៀតថា ហ្អែងស្គាល់អញអ្នកចំបក់ យកមកសាកសួររហូតបញ្ចប់នីតិវិធី បានបង្ហាញមុខជាសាធារណៈមុននឹងបញ្ជូនខ្លួនទៅសាលាដំបូងខេត្តដើម្បីចាត់ការតាមច្បាប់។
ប្រភពដដែលបន្តថា ដោយទទួលបញ្ជាពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ កាលពីថ្ងៃទី២០ ខែវិច្ឆិកា ឆ្នាំ២០២៤ថ្មីៗនេះ កម្លាំងនគរបាលព្រហ្មទណ្ឌអធិការដ្ឋាននគរបាលស្រុកសំរោងទងបានកំណត់មុខសញ្ញាក្មេងទំនើងនិងបន្ដសហការឃាត់ ៖
១-ឈ្មោះ ជៃ រក្សា ភេទប្រុស អាយុ១៨ឆ្នាំ អ្នកកាន់កាំបិតផ្គាក់
២-ឈ្មោះ អំ វ៉ាស៊ុ ភេទប្រុស អាយុ១៧ឆ្នាំ អ្នកឈរនិយាយពីក្រោយ ទាំង២នាក់រស់នៅភូមិចំបក់ ឃុំវល្លិ.ស ស្រុកសំរោងទង ។
ក្រោយសមត្ថកិច្ចសាកសួរពួកគេបានឆ្លើយសារភាពថា ខ្លួនពិតជាបានឈរកាន់កាំបិតផ្គាក់និយាយគំរាមទៅលេីក្មេងនៅភូមិប្រាកដមែន មូលហេតុមានទំនាស់ពាក្យសម្តីគ្នា។ ដោយថតជាវីដេអូ កាលពីថ្ងៃទី ១៨ ខែវិច្ឆិកា ឆ្នាំ២០២៤ ផ្ញើចូលគ្រុបMassenger រួចមានគេយកទៅបង្ហោះចែកចាយបន្ដ។
ក្នុងប្រតិបត្តិការនោះ កម្លាំងសមត្ថកិច្ចដកហូតកាំបិតផ្គាក់០១ដើម ។
បច្ចុប្បន្នសមត្ថកិច្ចកំពុងឃាត់ខ្លួនបណ្ដោះអាសន្ននៅស្នងការដ្ឋាននគរបាលខេត្ដ ដើម្បីបន្តតាមនីតិវិធីច្បាប់៕
ដោយ៖ តារា
