សារព័ត៌មាន នគរវត្ត តែងតែនាំមុខគេជានិច្ច
ក្រុមហង្សក្រហម Liverpool បានបន្តការនាំមុខរបស់ពួកគេនៅលើកំពូលតារាង Premier League ដល់ទៅ៨ពិន្ទុ ក្រោយពីវាយបកដើម្បីទទួលបានជ័យជម្នះចុងម៉ោងយ៉ាងសំខាន់នៅឯទឹកដីក្រុម Southampton ក្នុងលទ្ធផល ៣ទល់២ កាលពីរាត្រីថ្ងៃទី២៤ ខែវិច្ឆិកា។
ជាញឹកញយក្នុងរដូវកាលនេះ ការងារដ៏ល្អជាច្រើនរបស់ Southampton ត្រូវបានបរាជ័យ ដោយក្រុមហង្សក្រហមបានទាញយកប្រយោជន៍ដើម្បីពង្រឹងតំណែងកំពូលតារាងរបស់ពួកគេមុនពេលការប្រកួត Anfield ចុងសប្តាហ៍ក្រោយជាមួយនឹងក្រុមម្ចាស់ជើងឯក Manchester City។
ក្រុមហង្សក្រហម Liverpool បាននាំមុខមុនបន្ទាប់ពីលេងបាន៣០នាទី ដោយកីឡាករ Dominik Szoboszlai ហើយក្រុមម្ចាស់ផ្ទះបានស៊ុតបាល់បញ្ចូលទីតាមស្មើនៅនាទីទី៤២ តាមរយៈកីឡាករ Adam Armstrong ពេលដែលកីឡាកររូបនេះស៊ុតបាល់ប៉េណាល់ទីមិនចូលដោយត្រូវអ្នកចាំទី Caoimhin Kelleher បានសង្គ្រោះបាន ហើយក៏ត្រូវកីឡាកររូបនេះបន្ថែមចូលតែម្តង។
ចូលដល់ការប្រកួតតង់ទី២ ក្រុមម្ចាស់ផ្ទះបានរកគ្រាប់បាល់នាំមុខវិញដោយកីឡាករ Mateus Fernandes បានស៊ុតបាលបញ្ចូលទីតាមរយៈការបញ្ជូនរបស់ Armstrong ដើម្បីធ្វើឱ្យ Southampton នាំមុខបន្ទាប់ពីនាទី៥៦ ប៉ុន្តែភាពទន់ខ្សោយនៃខ្សែការពាររបស់ក្រុមនេះបានធ្វើឲ្យ Liverpool រកបាន២គ្រាប់ផ្ទួនៗបន្ថែមនៅចុងតង់ទី២។
អ្នកចាំទី Alex McCarthy មិនអាចរារាំងបាន ដោយត្រូវខ្សែប្រយុទ្ធ Mohamed Salah តាមស្មើវិញនៅនាទីទី៦៥ពីការបញ្ជូនរបស់កីឡាករ Ryan Gravenberch។ នៅចុងម៉ោងនាទីទី៨៣ ខ្សែប្រយុទ្ធ Mohamed Salah បានបន្ថែម១គ្រាប់ទៀតដែលជាគ្រាប់ជ័យជម្នះ ដែលធ្វើឲ្យក្រុមរបស់លោក Arne Slot បានធ្វើនូវអ្វីដែលក្រុមទាំងអស់ដែលមានក្តីប្រាថ្នាចង់ឈ្នះពាន Premier League ត្រូវធ្វើនៅក្នុងការឈ្នះដ៏មានព្រឹត្តិការណ៍នេះដើម្បីឈានទៅដល់ការទទួលជ័យជម្នះដ៏មានតម្លៃ។
ប្រសិនបើពួកគេយកឈ្នះលើក្រុម Manchester City នៅថ្ងៃអាទិត្យសប្តាហ៍ក្រោយ គឺនឹងបន្តនាំមុខដល់ទៅ១១ពិន្ទុ។ ចំណែកទីតាំងរបស់ Southampton នៅក្នុងតារាងមើលទៅកាន់តែអាក្រក់ទៅៗ ខណៈដែលក្តីសង្ឃឹមរបស់ពួកគេក្នុងការបង្កើតការភ្ញាក់ផ្អើលមួយត្រូវបានបរាជ័យដោយបន្តឈរបាតតារាង។
ឥឡូវនេះ Southampton គឺជាក្រុមទី៨ក្នុងប្រវត្តិសាស្ត្រការប្រកួតលីកកំពូលដែលចាញ់១០ប្រកួតក្នុង១២ប្រកួតដំបូងរបស់ពួកគេ ហើយគ្មាននរណាម្នាក់ក្នុងចំណោមប្រាំពីរមុនដែលបានរួចផុតពីការកាត់ចោលនោះទេ។ ប្រសិនបើពួកគេបន្តដូចនេះ Southampton នឹងត្រូវកាត់ចោលនៅរដូវកាលក្រោយ ហើយទទួលរងនូវការវិលត្រឡប់ទៅកាន់ Championship វិញភ្លាមៗ។ ចំណែក Liverpool ទទួលបានជោគជ័យជាលើកទី១០ក្នុងការប្រកួតបើកឆាក១២ប្រកួតរបស់ពួកគេ ៕
ដោយ៖ ភារៈ (រូបភាព ៖ BBC)
