ស្ត្រីម្នាក់ចងកសម្លាប់ខ្លួន បង្កការភ្ញាក់ផ្អើល ចំណែកប្ដីត្រូវបានសមត្ថកិច្ចនាំខ្លួនមកកាន់នគរបាលប៉ុស្តិ៍

ខេត្តសៀមរាប៖ ស្ត្រីម្នាក់ត្រូវគេរាយការណ៍ថា បានចងកសម្លាប់ខ្លួនក្នុងបន្ទាយទាហាន១កន្លែង។ ហេតុការណ៍បានកើតឡើង នៅថ្ងៃទី១៧ ខែ ធ្នូ ឆ្នាំ ២០២៤ វេលាម៉ោង២៣ និង៤០នាទី ចំណុចក្នុងបន្ទាយទាហាន (វរសេនាតូចវិស្វកម្មទិសបញ្ជារការស្រាលយោធភូមិភាគទី៤) ស្ថិតក្នុងភូមិត្រពាំងក្រសាំង ឃុំស្រែណូយ ស្រុកវ៉ារិន ខេត្តសៀមរាប។

សមត្ថកិច្ចបានប្រាប់អ្នកកាសែតនៅរសៀលថ្ងៃពុធនេះថា ជនរងគ្រោះ មានឈ្មោះ អុិត ស្រីស ភេទស្រី អាយុ ៣០ឆ្នាំ មានទីលំនៅបច្ចុប្បន្ន ភូមិក្របីរៀល សង្កាត់ក្របីរៀល ក្រុងសៀមរាប (មកស្នាក់នៅបណ្ដោះអាសន្នជាមួយប្ដីឈ្មោះឈៀង ផលគុណ អាយុ៣៥ ឆ្នាំ (យោធាវរសេនាតូចវិស្វកម្ម)។

សមត្ថកិច្ចបានប្រាប់បន្តថា បច្ចុប្បន្នកម្លាំងជំនាញនគរបាលព្រហ្មទណ្ឌនៃអធិការស្រុកវ៉ារិនសហការជាមួយនគរបាលរដ្ឋបាលស្រែណូយបាននាំខ្លួនឈ្មោះ ឈៀង ផលគុណ (ប្ដី)មកកាន់ប៉ុស្ដិ៍នគរបាលរដ្ឋបាលឃុំស្រែណូយ ដើម្បីស្តាប់ចម្លើយ ដើម្បីបន្តនិតិវិធី៕

ដោយ៖ សូរិយា