Liverpool បន្តកាន់កាប់កំពូលតារាងក្រោយបំបាក់ម្ចាស់ផ្ទះ Spurs ៦ទល់៣

ចែករំលែក៖

ក្រុមហង្សក្រហម Liverpool បានឡើងទៅឈរលើកំពូលតារាង Premier League ដោយដាច់ចំនួន៤ពិន្ទុពីក្រុមលេខ២ ខណៈដែលពួកគេបានផ្តល់ការវាយបកយ៉ាងចាស់ដៃទៅលើក្រុមម្ចាស់ផ្ទះ Tottenham Hotspur ក្នុងលទ្ធផល៦ទល់៣កាលពីរំលងអធ្រត្រឈានចូលថ្ងៃទី២៣ ធ្នូនេះ។

ក្រុមរបស់លោក Arne Slot មានទម្រង់លេងល្អបន្ទាប់ពីនាំមុខ២គ្រាប់មុនក្នុងដើមតង់ទី១ ដែល Luis Diaz រកបានគ្រាប់បាល់នាំមុខនៅនាទីទី២៣ ដោយការបញ្ជូនបាល់ដ៏ល្អឥតខ្ចោះរបស់ Trent Alexander-Arnold និងកីឡាករ Alexis Mac Allister រកបានគ្រាប់បាល់ទី២នៅ១៣នាទីក្រោយមក។

ខ្សែបម្រើ James Maddison បានរកគ្រាប់បាល់តាមពីក្រោយ១គ្រាប់ឲ្យ Spurs នូវក្តីសង្ឃឹមសម្រាប់ក្រុមម្ចាស់ផ្ទះដែលបានស៊ុតបញ្ចូលទីក្នុងគ្រាប់ទី៨របស់គាត់ក្នុងរដូវកាលនេះនៅនាទីទី៤១ ប៉ុន្តែនៅក្នុងម៉ោងបន្ថែមនៃតង់ទី១នាទីទី៤៥+១ Mohamed Salah បានបង្កើតឱកាសមួយដោយបានបញ្ជូនបាល់ឲ្យកីឡាករ Dominik Szoboszlai ស៊ុតបញ្ចូលទីគ្រាប់បាល់ទី៣នៃការប្រកួតនេះ។

Spurs ដោយមានបញ្ជីអវត្តមានយូរ និងដាក់ក្រុមដែលមិនផ្លាស់ប្តូរ បន្ទាប់ពីបានឆ្លងផុតទៅកាន់វគ្គ១/៤ផ្តាច់ព្រ័ត្រ League Cup ជាមួយ Manchester United កាលពីថ្ងៃព្រហស្បតិ៍ មើលទៅហាក់ដូចជាអស់សង្ឃឹម បន្ទាប់ពីក្រុមភ្ញៀវនាំមុខ៣ទល់១។

នៅក្នុងតង់ទី២ ក្រុមភ្ញៀវ Liverpool បានបន្តដាក់សម្ពាធទៅលើក្រុមម្ចាស់ផ្ទះរហូតដល់រកបានគ្រាប់បាល់២គ្រាប់ពីសំណាក់ខ្សែប្រយុទ្ធ Salah ដោយគ្រាប់បាល់ទី៤របស់ Liverpool រកបានដោយខ្សែប្រយុទ្ធរូបនេះនៅនាទីទី៥៤ និងគ្រាប់បាល់ទី៥នៅនាទីទី៦១។

២គ្រាប់របស់ Salah បានស្មើជាមួយនឹងកំណត់ត្រារបស់អតីតកីឡាករ Billy Liddell នៃការស៊ុតបញ្ចូលទី២២៨គ្រាប់របស់ Liverpool ស្ថិតក្នុងចំណាត់ថ្នាក់ទី៤ក្នុងបញ្ជីអ្នកស៊ុតបញ្ចូលទីគ្រប់ពេលរបស់ក្លិប ខណៈដែលក្រុម Spurs រកបានគ្រាប់បាល់ទី២ផងដែរ ដោយកីឡាករ Dejan Kulusevski នៅនាទីទី៧២ និងកីឡាករ Dominic Solanke ម្នាក់ទៀតរកបានគ្រាប់បាល់ទី៣នៅនាទីទី៨៣។

លទ្ធផល៥ទល់៣នេះមិនបានបញ្ចប់នោះទេ ដោយ Liverpool រកបានគ្រាប់បាល់ទី៦មួយគ្រាប់ទៀត នៅនាទីទី៨៥ ដោយកីឡាករ Diaz ពីការបញ្ជូនរបស់ខ្សែប្រយុទ្ធ Salah ធ្វើឲ្យលទ្ធផលចប់ការប្រកួត Liverpool យកឈ្នះ Spurs ៦ទល់៣។

Liverpool បានបាត់បង់ពិន្ទុក្នុងការប្រកួត Premier League ពីរលើកចុងក្រោយរបស់ពួកគេ ដោយស្មើ Newcastle United និងស្មើ Fulham ប៉ុន្តែលើកនេះបានយកឈ្នះយ៉ាងធំធេងទៅលើ Tottenham ដែលលទ្ធផល ៦-៣ បានធ្វើឱ្យក្រុមដ៏គួរឱ្យភ្ញាក់ផ្អើលរបស់លោក Arne Slot ធ្វើបានលើកដំបូងនៅរដូវកាលនេះ៕