🔥អគ្គិភ័យឆាបឆេះរថយន្តនឹងផ្ទះពីរករណីផ្សេងគ្នានៅស្រុកពញាក្រែក ខេត្តត្បូងឃ្មុំ

ខេត្តត្បូងឃ្មុំ៖ អគ្គិភ័យឆាបឆេះរថយន្តនឹងផ្ទះពីរករណីផ្សេងគ្នាកាលពីរសៀលថ្ងៃទី៦ ខែមករា ឆ្នាំ២០២៥នេះ នៅក្នុងស្រុកពញាក្រែក ខេត្តត្បូងឃ្មុំ ករណីនេះ មិនបង្កឲ្យប៉ះពាល់ដល់ជីវិតមនុស្សឡើយ។

សមត្ថកិច្ចបានឲ្យដឹងថា ករណីទី១បានកើតឡើង នៅវេលាម៉ោង ១រសៀល ថ្ងៃទី៦ ខែមករា ឆ្នាំ២០២៥នេះ នៅក្នុងស្រុកពញាក្រែក ខេត្តត្បូងឃ្មុំ មានករណីគ្រោះអគ្គិភ័យមួយបានឆេះផ្ទះប្រជាពលរដ្ឋឈ្មោះ នួន ស្រីនីត ភេទស្រី អាយុ ២១ឆ្នាំ នៅភូមិទួលកណ្តាល ឃុំពពេល ស្រុកពញាក្រែក ដែលបណ្តាលមកពីទុស្សេខ្សែភ្លើង។ គ្រោះអគ្គិភ័យនេះ បានប្រើប្រាស់រថយន្តពន្លត់អគ្គិភ័យរបស់អធិការដ្ឋាននគរបាលស្រុកពញាក្រែក ចំនួន១គ្រឿង អស់ទឹក ចំនួន១ឡាន ។

ករណីនេះដែរបណ្តាលឱ្យខូចខាតទ្រព្យសម្បត្តិរួមមាន ផ្ទះធ្វើអំពីឈើ និងដំបូលស័ង្កសី ទំហំ ៦ម៉ែត្រx ៨ម៉ែត្រ ចំនួន១ខ្នង ប្រាក់រៀលចំនួន ៣លានរៀល ប្រាក់ដុល្លារចំនួន ៤,០០០ ដុល្លារ គ្រែចំនួន៥ តុឈើ១ ស្រូវ ៨បេ កៅអី ៤ និងសម្ភារៈមួយចំនួនទៀត ។

ចំណែកករណីទី២: បានកើតឡើងនៅម៉ោង២រសៀលមានករណី ភ្លើងឆេះរថយន្តដឹកប្រេង ម៉ាកទីតានពណ៌ស នៅចំណុចភូមិល្អក់ ឃុំ ក្រែក ស្រុកពញាក្រែក ដែលមានអ្នកបើកបរឈ្មោះ វ៉ា ឃីម ភេទប្រុស អាយុ ២០ឆ្នាំ ជាតិខ្មែរ រស់នៅ ភូមិជីមាន់ជើង ឃុំក្រែក ស្រុកពញាក្រែក (គ្មានរបួស) ។

គ្រោះអគ្គិភ័យនេះ បានប្រើប្រាស់រថយន្តពន្លត់អគ្គិភ័យរបស់អធិការដ្ឋាននគរបាលស្រុកពញាក្រែក ចំនួន១គ្រឿង អស់ទឹក ចំនួន ០១ ឡាន។ ករណីនេះ បណ្តាលឱ្យខូចខាតរួមមាន. រថយន្តទាំងស្រុងចំនួន ១គ្រឿង ប្រេងម៉ាស៊ូតចំនួន ៣០កាន ប្រេងសាំងចំនួន ១០កាន ៕

ដោយ៖ ជ្រោយពេជ្រ