សារព័ត៌មាន នគរវត្ត តែងតែនាំមុខគេជានិច្ច
ខេត្តស្ទឹងត្រែង ៖ ពិធីប្រកាសចូលកាន់តំណែង នាយកសាលាមធ្យមសិក្សាសុខាភិបាលភូមិភាគស្ទឹងត្រែង ត្រូវបានធ្វើឡើងនៅបរិវេណសាលាមធ្យមសិក្សាសុខាភិបាល នាថ្ងៃទី១០ ខែមករា ឆ្នាំ២០២៥ ក្រោមអធិបតីភាព លោកសាស្ដ្រាចារ្យវេជ្ជបណ្ឌិត យឹត ស៊ុនណារ៉ា រដ្ឋលេខាធិការក្រសួងសុខាភិបាល ,លោក ឈាង ឡាក់ ប្រធានក្រុមប្រឹក្សាខេត្តស្ទឹងត្រែង និងលោក សរ សុពុត្រា អភិបាលខេត្តស្ទឹងត្រែង ដោយមានការចូលរួមពី ប្រតិភូអំណើរ ថ្នាក់ដឹកនាំខេត្ត និងមន្ទីរ ស្ថាប័ន អង្គភាពជុំវិញខេត្ត ព្រមទាំងអាជ្ញាធរពាក់ព័ន្ធ កងកម្លាំងប្រដាប់អាវុធ និងនិស្សិតពេទ្យជាច្រើននាក់។
យោងតាមប្រកាសរបស់ក្រសួងសុខាភិបាលស្ដីពី ការតែងតាំង ជូនមន្ត្រីរាជការ ក្នុងឱកាសនោះត្រូវបានសម្រេចប្រកាសចូលកាន់មុខតំណែងលោក តាត សុវណ្ណ នាយករងសាលាសាលាមធ្យមសិក្សាសុខាភិបាលភូមិភាគស្ទឹងត្រែង មកជានាយកសាលាជំនួសលោក តឹក ឡេងស៊ឺ ដែលបានចូលនិវត្តន៍។
នាឱកាសនោះ លោក សរ សុពុត្រា អភិបាលខេត្តស្ទឹងត្រែង បានកោតសរសើនិងវាយតម្លៃខ្ពស់ចំពោះ លោកសាស្ត្រចារ្យ តឹក ឡេងស៊ឺ អតីតនាយកសាលាមធ្យមសិក្សាសុខាភិបាលភូមិភាគស្ទឹងត្រែង ដែលលោកសាស្ត្រាចារ្យបានរួមចំណែកក្នុងការបង្កើនធនធានមនុស្សក្នុងវិស័យសុខាភិបាល។ លោកសាស្ត្រាចារ្យ ពិតជាបានបន្សល់នូវ ស្នាដៃ និងការខិតខំប្រឹងប្រែងជាច្រើន អំឡុងពេលលោកទទួលភារកិច្ច។
លោក សរ សុពុត្រា ក៏ចូលរួមអបអរសាទរផងដែរចំពោះលោក តាត សុវណ្ណ ដែលត្រូវបានក្រសួងសុខាភិបាលផ្តល់ការទុកចិត្តតែងតាំងជានាយកសាលាសាលាមធ្យមសិក្សា សុខាភិបាលភូមិភាគស្ទឹងត្រែង។ លោកមានប្រសាសន៍ថា ការតែងតាំងនេះសមស្របទៅតាមនឹងសមត្ថភាព ការខិតខំប្រឹងប្រែងរបស់លោកចាប់តាំងពីជានិស្សិតរហូតបានក្លាយជាមន្ត្រីសុខាភិបាល ។ ទន្ទឹមនេះសូមឲ្យ លោកនាយកសាលាថ្មី ដែលទើបចូលកាន់មុខតំណែងត្រូវខិតខំប្រឹងប្រែងរក្សាបាននូវអ្វីដែលជាវឌ្ឍនភាពរបស់សាលា និងត្រូវមានសាមគ្គីភាពគ្នា ការរួបរួមគ្នា ដើម្បីឲ្យអង្គភាពយើងមានកេរ្តិ៍ឈ្មោះល្អ រួមចំណែកឲ្យខេត្តមានការអភិវឌ្ឍ ទទួលបានការកោតសរសើ តាមរយៈជំនាញចំណេះដែលលោកធ្លាប់ទទួលបាន។
ថ្លែងសំណេះសំណាលនាឱកាសនេះ លោកសាស្ដ្រាចារ្យវេជ្ជបណ្ឌិត យឹត ស៊ុនណារ៉ា រដ្ឋលេខាធិការក្រសួងសុខាភិបាល វាយតម្លៃខ្ពស់ចំពោះគណៈគ្រប់គ្រងសាលា លោក លោកស្រី សាស្ត្រាចារ្យ និងមន្រ្តី គ្រប់ជាន់ថ្នាក់ក្នុងសាលាមធ្យមសិក្សាសុខាភិបាលភូមិភាគស្ទឹងត្រែង ដែលកន្លងមកបានសហការគ្នាបំពេញតួនាទីភារកិច្ចរបស់ខ្លួនយ៉ាងល្អប្រសើរ រួមចំណែកជាមួយរដ្ឋបាលខេត្ត ក្នុងការផ្តល់នូវពុទ្ធិ ចំណេះដឹង ក៏ដូចជាបទពិសោធន៍ល្អៗជូនដល់ក្មួយៗ ដើម្បីយកទៅបម្រើវិជ្ជាជីវៈខាងផ្នែកសុខាភិបាល ជូនប្រជាពលរដ្ឋនាពេលខាងមុខ។
លោក រដ្ឋលេខាធិការ ក៏បានផ្តាំផ្ញើដល់លោកនាយកសាលាមធ្យមសិក្សាសុខាភិបាលភូមិភាគស្ទឹងត្រែង ដែលទើបត្រូវបានតែងតាំងនាពេលនេះត្រូវយកចិត្តទុកដាក់អនុវត្តឲ្យមានប្រសិទ្ធភាព និងស្មារតីទទួលខុសត្រូវខ្ពស់ ស្របតាមតួនាទីភារកិច្ចរៀងៗខ្លួន បន្តពង្រឹងការអនុវត្តច្បាប់ លិខិតបទដ្ឋានគតិយុត្តិនានា និងគោលការណ៍ណែនាំផ្សេងៗរបស់រាជរដ្ឋាភិបាល ក្រសួងសុខាភិបាល ក៏ដូចជារដ្ឋបាលខេត្ត,ត្រូវពង្រឹងសាមគ្គីភាព ឯកភាពផ្ទៃក្នុងជាមួយគណ:គ្រប់គ្រងសាលា សាស្រ្តាចារ្យ សំដៅលើកស្ទួយកិត្យានុភាពថ្នាលបណ្តុះបណ្តាលមួយនេះឲ្យបានល្អប្រសើរ លុបបំបាត់រាល់ភាពអសកម្មទាំងឡាយ និងបង្កើនស្មារតីគោរពក្រមសីលធម៌វិជ្ជាជីវៈ៕
ដោយ ៖ សិលា
