សារព័ត៌មាន នគរវត្ត តែងតែនាំមុខគេជានិច្ច
ជើងហោះហើរជាង 3,000 ត្រូវបានលុបចោល ហើយរាប់ពាន់ជើងទៀតត្រូវពន្យារពេល ដោយសារព្យុះរដូវរងាបានវាយប្រហារភាគខាងត្បូងសហរដ្ឋអាមេរិក។
ក្រុមហ៊ុនអាកាសចរណ៍ Delta បាននិយាយថា “អាកាសធាតុរដូវរងាអាក្រក់ជាងការរំពឹងទុក” បណ្តាលឱ្យផ្លូវរត់ចំនួន 5 នៅអាកាសយានដ្ឋានអន្តរជាតិ Atlanta ត្រូវបិទអស់រយៈពេលជាង 2 ម៉ោង។
ក្រុមហ៊ុនអាកាសចរណ៍នេះបាននិយាយថា “ក្រុមហ៊ុនអាកាសចរណ៍ Delta ត្រូវលុបចោលជើងហោះហើរប្រហែល 1,100 នៅទូទាំងបណ្តាញរបស់ខ្លួន” ខណៈដែលខ្លួនធ្វើការដើម្បីស្តារប្រតិបត្តិការហោះហើរឡើងវិញ។
យន្តហោះរបស់ក្រុមហ៊ុនអាកាសចរណ៍ Delta Airlines ក៏បានលុបចោលការហោះហើរក្នុងទីក្រុង Atlanta ដោយសារបញ្ហាម៉ាស៊ីនដែរ។ ប្រព័ន្ធផ្សព្វផ្សាយអាមេរិកបានរាយការណ៍ថា អ្នកដំណើរនិងអាកាសយានិកជាង 200 នាក់បានរត់គេចខ្លួនតាមរយៈស្លាយសង្គ្រោះបន្ទាន់។
យោងតាម FlightAware អាកាសយានដ្ឋាន Dallas Fort Worth (Texas) និង Charlotte Douglas (North Carolina) ក៏រងផលប៉ះពាល់ដោយអាកាសធាតុអាក្រក់ផងដែរ ដោយជើងហោះហើរជាង 1,200 ត្រូវបានលុបចោល។ គេហទំព័រនេះបានកត់ត្រាការលុបចោលជើងហោះហើរជាង 3,000 កាលពីថ្ងៃទី 10 ខែវិច្ឆិកា នៅអាកាសយានដ្ឋានជាច្រើនទៀត។
បន្ថែមពីលើនេះ សាលារៀនជាច្រើននៅភាគខាងជើងរដ្ឋតិចសាស់ ត្រូវបានបង្ខំឱ្យបិទ ដោយសារឥទ្ធិពលព្យុះនេះ។ ជើងហោះហើររាប់រយនៅក្នុងតំបន់ Dallas ក៏ត្រូវបានលុបចោលផងដែរ។ ស្ថានភាពផ្លូវក្នុងតំបន់បានក្លាយជាគ្រោះថ្នាក់។
នៅ Little Rock រដ្ឋ Arkansas សាលារៀនត្រូវបានបង្ខំឱ្យបិទរយៈពេលពីរថ្ងៃដើម្បីរៀបចំសម្រាប់ព្យុះ។ ទីក្រុង Kansas ក៏បានបិទសាលារៀនមួយចំនួនផងដែរ ដោយសារ សីតុណ្ហភាពត្រជាក់។
អភិបាលរដ្ឋ Georgia លោក Brian Kemp បានប្រកាសថា ការិយាល័យមួយចំនួននៅទីនោះនឹងត្រូវបិទ ដោយសារព្យុះរដូវរងា។ នៅទីក្រុងអាត្លង់តា អភិបាលក្រុង Andre Dickens បាននិយាយថា ការិយាល័យរដ្ឋាភិបាលទីក្រុងទាំងអស់នឹងបិទ ហើយបុគ្គលិកនឹងធ្វើការពីចម្ងាយ។
បន្ទាប់ពីព្យុះនេះ សីតុណ្ហភាពនៅសហរដ្ឋអាមេរិកបានធ្លាក់ចុះទាបខ្លាំងជាច្រើនថ្ងៃ។ ទីក្រុងមួយចំនួនដូចជា Kansas ត្រូវបានគេរំពឹងថានឹងឃើញសីតុណ្ហភាពធ្លាក់ចុះក្រោមដក 17 អង្សាសេ ជាមួយនឹងខ្យល់ត្រជាក់។ សីតុណ្ហភាពក៏អាចធ្លាក់ចុះរាប់សិបដឺក្រេក្រោមសីតុណ្ហភាពតាមរដូវកាលនៅលើឆ្នេឈូងសមុទ្រអាមេរិក៕
ដោយ៖ ធីរីណា(រូបថត៖ Getty)
