ខេត្តកណ្តាលៈ យុវជនម្នាក់កំពុងអង្គុយលក់កាហ្វេនៅហាងរបស់ខ្លួនសុខៗ ស្រាប់តែមានជនទំនើង៣នាក់សម្រុកចូលទៅវាយ បណ្តាលឲ្យរងរបួសយ៉ាងធ្ងន់ធ្ងរ បន្ទាប់ពីមានហេតុការណ៍កើតឡើងជនល្មើសទាំង៣នាក់ ត្រូវបានសមត្ថកិច្ចនគរបាលប៉ុស្តិ៍តាខ្មៅអន្តរាគមន៍ចាប់ខ្លួនរួមជាមួយវត្ថុតាង ដើម្បីកសាងសំណុំរឿងចាត់ការតាមនីតិវិធីច្បាប់ ។ ចំណែកឯជនរងគ្រោះត្រូវបញ្ជូនទៅសង្រ្គោះនៅមន្ទីរពេទ្យផងដែរ ។
ករណីនេះបានកើតឡើង កាលពីវេលាម៉ោង១៨ និង២០នាទី ថ្ងៃទី៣១ ខែសីហា ឆ្នាំ២០១៦ ត្រង់ចំណុចហាងកាហ្វេជនរងគ្រោះ ស្ថិតក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល ។
មន្ត្រីនគរបាលក្រុងតាខ្មៅបានឲ្យដឹងថា ជនល្មើស៣នាក់ដែលត្រូវបានចាប់ខ្លួននោះ ទី១-ឈ្មោះ ញឹម ទិត្យ ភេទប្រុស អាយុ២០ឆ្នាំ មុខរបរ កម្មករ ស្រុកកំណើត ភូមិត្រពាំងអញ្ចាញ ឃុំត្រពាំងអញ្ចាញ ស្រុកកំពង់ឆ្នាំង ខេត្តកំពង់ឆ្នាំង បច្ចុប្បន្នស្នាក់នៅផ្ទះ ជួលភូមិព្រែកសំរោង សង្កាត់តាខ្មៅ ក្រុងតាខ្មៅ ទី២-ឈ្មោះ វ៉ាន់ បញ្ញា ភេទប្រុស អាយុ១៩ឆ្នាំ មុខរបរ កម្មករ មានស្រុកកំណើតភូមិស្នាយពុល ឃុំត្រកៀត ស្រុកពារាំង ខេត្តព្រៃវែង បច្ចុប្បន្នស្នាក់នៅភូមិព្រែកសំរោង សង្កាត់តាខ្មៅ ក្រុងតាខ្មៅ ទី៣-ឈ្មោះ ហឿង ធារ៉ា ភេទប្រុស អាយុ២៦ឆ្នាំ មុខរបរ កម្មករ មានស្រុកកំណើតភូមិរការខ្នុរ ឃុំរការខ្នុរ ស្រុកក្រូចឆ្មារ ខេត្តកំពង់ចាម បច្ចុប្បន្នស្នាក់នៅភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ។ ចំណែកឯជនរងគ្រោះឈ្មោះ សុខ សុភណា្ឌរិន ភេទប្រុស អាយុ២១ឆ្នាំ មុខរបរ លក់កាហ្វេ មានទីលំនៅភូមិស្ទឹងជ្រៅ សង្កាត់ដើមមៀន ក្រុងតាខ្មៅ ។
ប្រភពដដែលបន្តថា រយៈពេលកន្លងមកក្រុមជនល្មើសធ្លាប់មានទំនាស់គ្នាជាមួយបងប្អូនជនរងគ្រោះ ។ លុះមកដល់ថ្ងៃកើតហេតុក្រុមជនល្មើសបានដេញតាមវាយបងប្អូនជនរងគ្រោះជនរងគ្រោះរហូតដល់ហាងលក់កាហ្វេ ឃើញដូច្នេះជនរងគ្រោះក៏បានដើរទៅសួរនាំក្រុមជនល្មើស ក៏ត្រូវជនល្មើសវាយដោយខ្សែក្រវ៉ាត់និងគុបត្រូវមួយដាវ បណ្តាលឲ្យរងរបួសយ៉ាងធ្ងន់ធ្ងរ ។ បន្ទាប់ពីធ្វើសកម្មភាពរួច ក្រុមជនល្មើសបាននាំគ្នារត់បម្រុងគេចខ្លួន តែត្រូវបានសមត្ថកិច្ចនគរបាលប៉ុស្តិ៍តាខ្មៅអន្តរាគមន៍ចាប់ខ្លួនបានទាន់ពេលវេលា ។
បច្ចុប្បន្នជនល្មើសទាំង៣នាក់ ត្រូវបានសមត្ថកិច្ចនគរបាលក្រុងតាខ្មៅ កសាងសំណុំរឿងចាត់ការតាមច្បាប់៕ ស្អាងជ័យ
សារព័ត៌មាន នគរវត្ត តែងតែនាំមុខគេជានិច្ច
