សារព័ត៌មាន នគរវត្ត តែងតែនាំមុខគេជានិច្ច
នៅថ្ងៃទី 25 ខែមីនា អនុប្រធានគណៈកម្មការអឺរ៉ុប Maros Sefcovic – ប្រធានគណៈប្រតិភូពាណិជ្ជកម្មសហភាពអឺរ៉ុប (EU) ទៅកាន់ទីក្រុង Washington ដើម្បីជួបជាមួយដៃគូអាមេរិកក្នុងកិច្ចខិតខំប្រឹងប្រែងចុងក្រោយបង្អស់ដើម្បីការពារការកើនឡើងនៃសង្គ្រាមពាណិជ្ជកម្មឆ្លងមហាសមុទ្រអាត្លង់ទិក។យោងតាមសារព័ត៌មាន Politico អមដំណើរលោកគឺលោក Bjorn Seibert ជំនួយការជាន់ខ្ពស់របស់ប្រធានគណៈកម្មការអឺរ៉ុប Ursula von der Leyen ដែលបង្ហាញពីសារៈសំខាន់ផ្នែកនយោបាយនៃការធ្វើដំណើរនេះ។
នៅទីក្រុងវ៉ាស៊ីនតោន លោក Sefcovic គ្រោងនឹងជួបជាមួយរដ្ឋមន្ត្រីក្រសួងពាណិជ្ជកម្មសហរដ្ឋអាមេរិក លោក Howard Lutnick និងតំណាងពាណិជ្ជកម្ម Jamieson Greer នៅថ្ងៃទី 25 ខែមីនា (ម៉ោងក្នុងស្រុក)។ នេះជាដំណើរទស្សនកិច្ចលើកទីពីររបស់លោកទៅកាន់សហរដ្ឋអាមេរិកចាប់តាំងពីលោកប្រធានាធិបតី Donald Trump ចូលកាន់តំណែងក្នុងខែមករា។
ការធ្វើដំណើរនេះបានកើតឡើងនៅពេលដែលសហភាពអឺរ៉ុបកំពុងពិចារណាលើការដាក់ពន្ធសងសឹកលើទំនិញរបស់សហរដ្ឋអាមេរិកដែលមានតម្លៃ 21.5 ពាន់លានអឺរ៉ូ ជាការឆ្លើយតបទៅនឹងពន្ធថ្មីដែលដាក់ដោយទីក្រុងវ៉ាស៊ីនតោនលើដែកថែប និងអាលុយមីញ៉ូមចាប់តាំងពីដើមខែមីនា។ សហភាពអឺរ៉ុបធ្លាប់បានសម្រេចចិត្តពន្យារពេលពន្ធគយដែលបានគ្រោងទុកពីថ្ងៃទី 1 ខែមេសា ដល់ថ្ងៃទី 13 ខែមេសា ដើម្បីទុកពេលវេលាបន្ថែមទៀតក្នុងការចរចា និងកែតម្រូវការឆ្លើយតបរបស់ខ្លួន ខណៈដែលសហរដ្ឋអាមេរិកកំពុងរៀបចំប្រកាសជុំបន្ទាប់នៃពន្ធ “ទៅវិញទៅមក” ដែលគ្រោងនឹងចូលជាធរមាននៅថ្ងៃទី 2 ខែមេសា។
ទោះជាយ៉ាងណាក៏ដោយ នៅតែមានការខ្វែងគំនិតគ្នានៅក្នុងសហភាពអឺរ៉ុបអំពីបញ្ជីទំនិញដែលអាចនឹងត្រូវទទួលពន្ធសងសឹក។ ប្រទេសបារាំង និងអ៊ីតាលីបានសម្តែងការព្រួយបារម្ភអំពីការរួមបញ្ចូលស្រា និងភេសជ្ជៈមានជាតិអាល់កុលនៅក្នុងបញ្ជីពន្ធ ដែលធ្វើឱ្យវាកាន់តែពិបាកសម្រាប់ប្លុកក្នុងការយល់ព្រមលើជំហរមួយ។
បន្ទាប់ពីបញ្ចប់កិច្ចប្រជុំនៅទីក្រុងវ៉ាស៊ីនតោន លោក Sefcovic នឹងធ្វើដំណើរទៅកាន់ទីក្រុងប៉េកាំងនៅថ្ងៃទី 27 និង 28 ខែមីនា ដែលជាដំណើរទស្សនកិច្ចលើកដំបូងរបស់លោកទៅកាន់ប្រទេសចិនចាប់តាំងពីការឡើងកាន់តំណែងជាស្នងការពាណិជ្ជកម្មសហភាពអឺរ៉ុបកាលពីចុងឆ្នាំមុន៕ ដោយ៖ ធីរីណា
រូបថត៖ TTXVN
