សារព័ត៌មាន នគរវត្ត តែងតែនាំមុខគេជានិច្ច
ភ្នំពេញៈ រថយន្ដហាយព្រីដមួយគ្រឿង បើកបត់ឆ្វេងឆ្លងផ្លូវមិនប្រយ័ត្នត្រូវម៉ូតូឌ្រីមសង់ បុកចំពីមុខពេញទំហឹងបណ្ដាលអោយអ្នកជិះពីរនាក់រងរបួស ចំណែកម៉ូតូរងការខូចខាត។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង២២និង០៧នាទី ថ្ងៃទី១២ ខែធ្នូ ឆ្នាំ២០១៦ នៅចំណុចផ្លូវលេខ២៤០កែងនឹងផ្លូវព្រះសុីសុវត្តិ ស្ថិតក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ។
ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ គេបានឃើញរថយន្ដមួយគ្រឿងម៉ាកកាមរីហាយព្រីឌ ពណ៍ស្ករ ពាក់ស្លាកលេខភ្នំពេញ2AR-1101 បើកបរដោយបុរសពីរនាក់ធ្វើដំណើរតាមបណ្ដោយផ្លូវព្រះសុីសុវត្តិក្នុង ទិសដៅពីត្បូងទៅជើងហើយបានបត់ឆ្វេងឆ្លងផ្លូវចូលទៅផ្លូវលេខ២៤០ ពេលដែលកំពុងបត់ ក៏ត្រូវម៉ូតូម៉ាកឌ្រីមសង់ C125 សេរីឆ្នាំ២០១៧ ពណ៌ខ្មៅ គ្មានស្លាកលេខ ជិះដោយបុរសពីរនាក់ទិសដៅបញ្ច្រាសទិសគ្នា ជ្រុលបុកចំពីមុខពេញទំហឹងបណ្ដាលអោយអ្នកជិះម៉ូតូទាំងពីរនាក់រងរបួសជើងទាំងពីរនាក់ ចំណែកម៉ូតូ និងរថយន្ដរងការខូចខាតទាំងសងខាង។
ក្រោយពីកើតហេតុកម្លាំងសមត្ថកិច្ចមូលដ្ឋានចុះដល់កន្លែងកើតហេតុ និងសម្របសម្រួលភាគីទាំងសងខាង ដោយភាគីខាងម្ចាស់រថយន្ដព្រមសងថ្លៃការខូចខាត និងថ្លៃព្យាបាលរបួសចំនួន១៥០ដុល្លារដើម្បីបញ្ចប់រឿងនៅកន្លែងកើតហេតុតែម្ដង៕ ព្រែកជ័យ
