ម៉ូតូ២គ្រឿងបុកគ្នារបួសធ្ងន់ស្រាល៤នាក់

ខេត្តស្វាយរៀង៖ មនុស្ស៤នាក់ រងរបួសធ្ងន់ ស្រាលដោយសារករណីគ្រោះថ្នាក់ចរាចរណ៍គួរអោយរន្ធត់រវាងម៉ូតូ នឹងម៉ូតូកាលពីវេលាម៉ោង៦និង៥០ នាទី ថ្ងៃទី២១ ខែមករា ឆ្នាំ២០១៧ នៅលើផ្លូវលំក្រាលគ្រួស ត្រង់ចំណុចភូមិខ្ពបត្រាច ឃុំជ្រៃធំ ស្រុករមាសហែក។

សមត្ថកិច្ចនគរបាលស្រុកបានអោយដឹងថា មុនកើតហេតុមានបុរសឈ្មោះ សុខ ឈន់ អាយុ៣៣ឆ្នាំ រស់នៅភូមិឈើភ្លើង ឃុំកំពង់ត្រាចស្រុករមាសហែកខេត្តស្វាយរៀង ។ ជាអ្នកបើកបរម៉ូត ម៉ាក់ HONDA វ៉េវ C100 ពណ៌ខ្មៅ អត់ស្លាកលេខ បើកពីទិសខាងជើងមកត្បួងក្នុងល្បឿនលឿន អ្នករួមដំណើរឈ្មោះ ប៉ែន រឹម ភេទប្រុស អាយុ57ឆ្នាំ រស់នៅភូមិ ឃុំជាមួយគ្នា ស្របទិសគ្នា ក៏បុកនឹងម៉ូតម៉ាកហុងដា សេ១២៥ ពាក់ស្លាកលេខ ១Q៨៦៧១ បើកបរដោយឈ្មោះ កឹម ភាត ភេទប្រុស អាយុ20ឆ្នាំ ភូមិរមាសហែក ឃុំអំពិល ស្រុករមាសហែក និងអ្នករួមដំណើរឈ្មោះទិត្យ ណារ៉ូ ភេទប្រុស អាយុ23ឆ្នាំ រស់នៅភូមិ ឃុំជាមួយគ្នាពេញទំហឹងបណ្ដាលអោយដួលរដូករណែលពេញផ្លូវតែម្ដង។

ក្រោយពីកើតហេតុ សមត្ថកិច្ចនគរបាលបានមកអន្តរាគមន៍ដឹកភាគីទាំងសងខាងមកកាន់មន្ទីរពេទ្យខេត្តស្វាយរៀង ។

សមត្ថកិច្ចបានអោយដឹងថា មូលហេតុដោយសារតែ អ្នកបើកម៉ូតូម៉ាក HONDA វ៉េវC100 បើកបរពុំប្រកាន់ស្ដាំ ហើយ ម៉ូតូម៉ាក HONDA.C125 ប្រើប្រាស់ល្បឿនលឿន និងមានជាតិអាកុលផងដែរ ៕ យឹម សុថាន