សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រោយពីការចាកចេញពីផលិតកម្មហង្សមាសរបស់តារាចម្រៀង យក់ ថិតរដ្ឋា និងឈិត សុវណ្ណបញ្ញា មិនបានប៉ុន្មានផង ស្រាប់តែពេលនេះ បានលេចចេញនូវដំណឹង នៃការស្ពាយបង្វិចរបស់តារាចម្រៀងស៊ុន ស្រីពេជ្រ ម្នាក់ទៀត ទៅជ្រកក្រោមដំបូលផលិតកម្មថោនដែរ ។
ការលេចចេញដំណឹងចូលផលិតកម្មថ្មីរបស់តារាចម្រៀងស្រគត់ស្រគំ ស៊ុន ស្រីពេជ្រ នេះបានកើតឡើង ក្រោយពីនាងប្រកាសចេញពីផលិតកម្មចាស់កាលពីអំឡុងសប្តាហ៍មុន។
ប្រភពពីតារាចម្រៀងនៅផលិតកម្មថោនម្នាក់ បានលើកឡើងថា ស៊ុន ស្រីពេជ្រ បានបង្ហាញវត្តមាននៅផលិតកម្មថោនរួចហើយ ជាមួយនឹងការចុះកិច្ចសន្យាក៏ហើយរួចដែរ ។
ប្រភពបញ្ជាក់ថា កូនស្រីតារាកំប្លែងនាយសង់ ស៊ីសរូបនេះ បានហក់មកទុំលើទ្រនំថ្មី ក្នុងផលិតកម្មថោនសើមៗ ត្រឹមតែប៉ុន្មានថ្ងៃចុងក្រោយនេះប៉ុណ្ណោះ បន្ទាប់ពីយក់ ឋិតរដ្ឋា និងឈិត សុវណ្ណបញ្ញា បានដើរចេញដូចគ្នា។
ដំណឹងនេះ មានការកន្ត្រាក់អារម្មណ៍គួរសមព្រោះមានមហាជនជាច្រើនចង់ដឹងថា តើកញ្ញាសុន ស្រីពេជ្រ ដែលអត់ទ្រាំលែងបានរហូតសម្រេចចិត្តចាកពីផលិតកម្មហង្សមាស រហូតប្រកាសឲ្យគេដឹងពីរឿងលាលែងនេះ នឹងចូលមកជ្រកក្នុងផលិតកម្មក្នុងស្រុកមួយណា ដែលនាងអាចស្នាក់អាស្រ័យ ហើយអាចជួយយិតយោងឲ្យនាងបានល្បីលេចធ្លោសារជាថ្មី បន្ទាប់ពីស្ងាត់ទីផ្សារចម្រៀងរបស់ខ្លួនមួយរយៈពេលកន្លងមក។
ប្រភពបន្តថា អ្វីដែលធ្វើឲ្យតារាចម្រៀងរូបនេះដាច់ចិត្តវេចសម្ពាយចាកចេញ ព្រោះតែនាងមិនទទួលបានបទចម្រៀងដូចគ្រាមុនពីផលិតកម្មចាស់ ។ មានការលើកឡើងថា ក្នុងឱកាសចូលឆ្នាំថ្មីនេះ នាងក៏មិនមានបទចម្រៀងសម្រាប់ចេញលក់នៅលើទីផ្សារទេ ហើយវាបានធ្វើមានការជជីកសួរច្រើនចំពោះនាង ហើយនាងក៏សម្រេចចិត្តចាកចេញទាំងក្តីអាល័យ។
ប្រភពខាងលើបញ្ជាក់ដែរថា ស៊ុន ស្រីពេជ្រ មិនទាន់ទទួលបានបទចម្រៀងថ្មីច្រៀងនៅឡើយទេ ក្រោយពីដើរចូលផលិតកម្មថ្មីនេះ ប៉ុន្តែនាងអាចពន្យារពេលបន្តិច ព្រោះតែតារាស្រីរូបនេះ កំពុងត្រៀមខ្លួនចាកចេញពីកម្ពុជាទៅច្រៀងរាំនៅលើទឹកដីនៃប្រទេសបារាំង នៅពាក់កណ្តាលខែមីនានេះ ។
តារាចម្រៀង ស៊ុន ស្រីពេជ្រ ស្នើមិនបកស្រាយពីបញ្ហានេះ ព្រោះតែនាងមិនចង់ឲ្យមានការថ្នាំងថ្នាក់ពីផលិតកម្មចាស់ ប៉ុន្តែនាងទទួលស្គាល់ថា ពិតជាបានចាកចេញពីផលិតកម្មហង្សមាសពិតមែន។
នាងក៏សុំមិនបញ្ជាក់ដែរថា នាងនឹងចូលទៅជ្រកក្រោមផលិតកម្មថោន ដូចការលេចលឺមែន ឬយ៉ាងណាទេ គឺនាងសុំឲ្យពេលដែលច្បាស់លាស់ នាងនឹងបញ្ជាក់នៅពេលក្រោយ៕ វឌ្ឍនា
