បុរសម្នាក់បើករថយន្តម៉ាកTOYOTA TACOMA សង្ស័យស្រវឹងស្រារេចង្កូតទៅបុករបាំងក្បាលថ្មចែកទ្រូងផ្លូវបណ្តាលឲ្យខ្ទេចខាងមុខទៅលែងរួច

ភ្នំពេញៈ បុរសម្នាក់ សង្ស័យស្រវឹងស្រា បានបើករថយន្តមួយគ្រឿងមា៉កTOYOTA TACOMA ទៅបុករបាំងក្បាលថ្មចែកទ្រូងផ្លូវបណ្តាលឲ្យអស់ខ្ទេចមួយកំណាត់ខាងមុខទៅលែងរួច។

ហេតុការណ៍នេះ បង្កឲ្យមានការភ្ញាល់ផ្អើលកាលពីវេលាម៉ោង២និង២០នាទីរំលងអធ្រាត្រ ឈានចូលថ្ងៃទី២ ខែមេសា ឆ្នាំ២០១៧ តាមបណ្តោយផ្លូវមៅ៉សេទុង សង្កាត់ទំនប់ទឹក ខណ្ឌចំការមន រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញបុរសម្នាក់បើករថយន្តមួយគ្រឿងម៉ាក TOYOTA TACOMA ពណ៌ទឹកប្រាក់ ពាក់ស្លាកលេខ ភ្នំពេញ 2B-0969 ក្នុងទិសដៅពីត្បូងទៅជើង ពេលមកដល់ចំណុចកើតហេតុខាងលើ បានរេចង្កូតទៅបុកចំក្បាលព្រួញពុះចែកទ្រូងផ្លូវខ្ទេចមួយកំណាត់ខាងឆ្វេងខាងមុខ ទៅលែងរួច។ ភ្លាមៗនោះម្ចាស់រថយន្តខាងលើបានបើកទ្វារ រត់គេចខ្លួនបាត់ស្រមោលតែម្តង ។

ក្រោយពេលកើតហេតុ សមត្ថកិច្ចខណ្ឌចំការមនបានប្រគល់រថយន្តបង្កឲ្យទៅការិយាល័យចរាចរណ៍ជើងគោករាជធានី រង់ចាំដោះស្រាយគ្នានៅពេលក្រោយទៀត ៕ ស រស្មី