កីឡាករ កីឡាការិនីតេក្វាន់ដូITF៣០០នាក់ ចាប់ផ្តើមប្រកួតជើងឯកថ្នាក់ជាតិ

ភ្នំពេញ៖ សហព័ន្ធកីឡាតេក្វាន់ដូ ITFសហការជាមួយនាយកដ្ឋានអប់រំកាយ និងកីឡា រៀបចំការប្រកួត ជ្រើសរើសជើងឯកថ្នាក់ឆ្នាំ២០១៧ ដោយមាន ការចូលរួមរបស់កីឡាករកីឡាការិនីតេក្វាន់ដូITF ប្រមាណ ៣០០នាក់ចាប់ផ្តើមកាលពីព្រឹកថ្ងៃទី៨ខែមិថុនាឆ្នាំ២០១៧ នៅវិមាននៃពហុកីឡាដ្ឋានជាតិអូឡាំពិក។

តាមកម្មវិធីរបស់នាយកដ្ឋានអប់រំកាយនិងកីឡា បានបង្ហាញឲ្យដឹងថា ការប្រកួតនៅព្រឹកថ្ងៃទី៨ខែមិថុនា មានវិញ្ញាសាសម្តែងមេគុនកាតាចំនួន៦វិញ្ញាសាគឺសម្តែងមេគុនខ្សែក្រវ៉ាត់កម្រិតក្រោមពណ៌ខ្មៅ (បុរស) សម្តែងមេគុនខ្សែក្រវ៉ាត់កម្រិតក្រោមពណ៌ខ្មៅ (នារី) សម្តែងមេគុនកុមារាសម្តែងមេគុនកុមារីសម្តែងមេគុនជាក្រុមបុរស-នារីនិងវិញ្ញាសាសម្តែងមេគុនខ្សែក្រវ៉ាត់ខ្មៅមួយជាន់ (បុរស)។

ប្រភពព័ត៌មានមន្ត្រីបច្ចេកទេសរៀបចំការប្រកួត របស់សហព័ន្ធកីឡាតេក្វាន់ដូ ITFកម្ពុជាបានឲ្យដឹងថាប្រកួតជើងឯកឆ្នាំនេះមានកីឡាករ-កីឡាការិនីចូលរួមចំនួន៣០០នាក់ក្នុងនោះមានកីឡាការិនី៤១នាក់និងមានក្លិបចំនួន១៧បានបញ្ជូនអត្តពលរបសខ្លួនចូលរួមប្ករួតគឺក្លិបបាក់ទូកក្លិបបាក់ខែងក្លិបសេរីភាពក្លិបព្រែកហូក្លិបសហភាពសហព័ន្ធយុវជនកម្ពុជាខេត្តកណ្តាលក្លិបក្តីចាស់ក្លិបមិត្តភាពក្លិបសាកលវិទ្យាល័យIIC ក្លិបយុវជនក្លិបយុវជន១ក្លិបវិទ្យាល័យហ៊ុនសែនតាខ្មៅក្លិបព្រៃកប្បាសក្លិបកងរាជអាវុធហត្ថភ្នំពេញក្លិបសហភាពសហព័ន្ធយុវជនកម្ពុជាខេត្តកំពង់ស្ពឺក្លិបស្រីសន្ធរក្លិបពន្លឺយុវជនខេត្តកំពង់ស្ពឺនិងក្លិបពន្លឺយុវជនទី១ខេត្តកំពង់ស្ពឺ៕ សារីម