សារព័ត៌មាន នគរវត្ត តែងតែនាំមុខគេជានិច្ច
ខេត្តប៉ៃលិន៖ នៅរសៀលថ្ងៃទី៤ ខែ សីហា ឆ្នាំ ២០១៧ លោក កើត សុធា អភិបាលនៃគណៈអភិបាលខេត្តប៉ៃលិន បានដឹកនាំ ព្រះសង្ឃ មន្រ្តីរាជការ កងកំលាំងប្រដាប់អាវុធ គ្រប់ជាន់ថ្នាក់ និងសិស្សានុសិស្ស បងប្អូនប្រជាពលរដ្ឋនៅទូទាំងខេត្តប៉ៃលិន បានចូលរួមដង្ហែសពព្រះគ្រូ ព្រះរតនមុនី ចាន់ គង់ ព្រះរាជាគណៈថ្នាក់ចត្វាព្រះមេគណ គណៈមហានិកាយខេត្តប៉ៃលិន និងជាព្រះគ្រូចៅអធិការវត្តគិរិរតនារាម (ភ្នំយ៉ាត) ពីភូមិភ្នំកុយ ស្រុកសាលាក្រៅព្រំប្រទល់ខេត្តប៉ៃលិន-ខេត្តបាត់ដំបង ដើម្បីដង្ហែព្រះសពមកតំកល់ទុកនៅវត្តគិរីសិលារាម ហៅវត្តភ្នំយ៉ាត ខេត្តប៉ៃលិន រៀបចំតាមកម្មវិធីបុណ្យទៅតាមព្រះពុទ្ធសាសនា។
ព្រះសពរបស់ ព្រះគ្រូ ព្រះរតនមុនី ចាន់ គង់ ព្រះរាជាគណថ្នាក់ចត្វាព្រះមេគណគណៈមហានិកាយខេត្តប៉ៃលិន និងជាព្រះគ្រូចៅអធិការវត្តគិរិរតនារាម (ភ្នំយ៉ាត) ត្រូវបានដង្ហែចេញពីស្រុកកំណើតរបស់ព្រះអង្គ ស្ថិតនៅស្រុកបវេល ខេត្តបាត់ដំបង ដែលដឹកនាំដោយលោកស្រី សោ មុន្នីរ័ត្ន អភិបាលរងខេត្តប៉ៃលិន និង លោកស្រី សាន សាវឿន ស្នងការរងខេត្តប៉ៃលិន និងព្រះសង្ឃជាច្រើនអង្គ ។
សូមបញ្ជាក់ថា ព្រះគ្រូ ព្រះរតនមុនី ចាន់ គង់ ព្រះរាជាគណថ្នាក់ចត្វាព្រះមេគណគណៈមហានិកាយខេត្តប៉ៃលិន និងជាព្រះគ្រូចៅអធិការវត្តគិរិរតនារាម (ភ្នំយ៉ាត) បានទទួលអនិច្ចធម្ម(សុគត់) ក្នុងព្រះជន្មាយុ ៨១ព្រះវស្សា នៅវេលាម៉ោង៦និង២៤ នាទីល្ងាច ថ្ងៃទី៣ ខែសីហា ឆ្នាំ២០១៧ នេះ នៅស្រុកកំណើតរបស់ព្រះអង្គ ស្ថិតនៅស្រុកបវេល ខេត្តបាត់ដំបង។ ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ប្រជាពលរដ្ឋទូទាំងខេត្តប៉ៃលិន និង ព្រមទាំងពុទ្ធបរិស័ទឆ្ងាយជិត បានសំដែងការសោកស្តាយ និងចូលរួមរំលែកទុក្ខដ៏ក្រៀមក្រំចំពោះការបាត់បង់ព្រះគ្រូ ព្រះរតនមុនី ចាន់ គង់ ព្រះរាជាគណៈថ្នាក់ចត្វាព្រះមេគណគណៈមហានិកាយខេត្តប៉ៃលិន និង ជាព្រះគ្រូចៅអធិការវត្តគិរិរតនារាម ភ្នំយ៉ាត ៕ ស សារ៉េត
