សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ព្រូរថយន្តម្នាក់បានកៀបជាប់នៅក្នុងកាប៊ីនបណ្តាលឲ្យស្លាប់ និង ព្រូម្នាក់ទៀតបានរួចផុតពីសេចក្តីស្លាប់ តែរបួសធ្ងន់ត្រូវបានរថយន្តសង្គ្រោះ ដឹកយកទៅកាន់មន្ទីរពេទ្យភា្លម នៅក្នុងហេតុការណ៍គ្រោះថ្នាក់ចរាចរណ៍កាល ពីវេលាម៉ោង៤ទៀបភ្លឺ ថ្ងៃទី១ ខែកញ្ញា ឆ្នាំ២០១៧ នៅលើបណ្តោយផ្លូវលេខ៥៩៨ ស្ថិតក្នុងភូមិសាស្ត្រសង្កាត់ច្រាំងចំរេះ២ ខណ្ឌឫស្សីកែវ។
ប្រភពពីសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេ បានឮសំឡេងរថយន្តរងគ្រោះ បើកយ៉ាងលឿន ហើយក៏ឮលាន់ប្រាវ នៅពេលនោះគេបានឃើញបុរសម្នាក់របួសវារចេញពីក្នុងរថយន្តនោះ តែឃើញតែរថយន្តរងគ្រោះដឹកមាន់នោះទេ មិនឃើញរថយន្តមួយទៀតឡើយ។ ហេតុដូច្នេះមិនដឹងថា រថយន្តដឹកមាន់នោះ ទៅបុកជាមួយនឹងរថយន្តអ្វី។
ប្រភពពីស្ត្រីម្នាក់បានឲ្យដឹងថា អ្នកបើកបររថយន្តដឹកមាន់នោះគាត់បានដេញតាមរថយន្តបង្កហេតុ ហើយគឺដឹងថាជារថយន្តក្រឡុកស៊ីម៉ង់ត៍។
សមត្ថកិច្ចបានឲ្យដឹងថា រថយន្តរងគ្រោះជារថយន្តដឹកមាន់ ពាក់ស្លាកលេខ ភ្នំពេញ 2T-7752 ។ ចំណែកជនរងគ្រោះស្លាប់ឈ្មោះ ទៀប នី ភេទប្រុស អាយុ១៧ឆ្នាំ ភូមិសំរោងតូច សង្កាត់ភ្នំពេញថ្មី ខណ្ឌសែនសុខ។
សមត្ថកិច្ចបន្តថា រថយន្តដឹកមាន់នោះ អាចបុករថយន្ត១គ្រឿងទៀត ពីក្រោយ ហើយរថយន្តដែលត្រូវគេបុក ក៏រត់បាត់ទៅ មិនដឹងថាជារថយន្តម៉ាកអ្វីផងដែរគ្មានអ្នកណាម្នាក់អះអាងនោះទេ។
សមត្ថកិច្ចបន្តទៀតថា ក្រោយកើតហេតុរថយន្តរងគ្រោះនេះបានប្រគល់ឲ្យទៅរក្សាទុកការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ និងសាកសពសមត្ថកិច្ចបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕ តាឡឹម
