សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ ព័ត៌មានប្រចាំថ្ងៃរបស់ស្នងការដ្ឋាននគរបាលខេត្តព្រះសីហនុ បានឲ្យដឹងថា៖ នៅវេលាម៉ោង១៨និង៥នាទី ថ្ងៃទី១៣ ខែវិច្ឆិកា ឆ្នាំ២០១៧ ផ្លូវជាតិលេខ៤ ចន្លោះ គីឡូម៉ែត្រ១៨០-១៨១ ស្ថិតនៅក្នុងភូមិបឹងវែង ឃុំវាលរេញ ស្រុកព្រៃនប់ ខេត្តព្រះសីហនុ មានគ្រោះថ្នាក់ចរាចរណ៍មួយកើតឡើង រវាង ម៉ូតូម៉ាក SUZUKI smash ពណ៌ខ្មៅ គ្មានផ្លាកលេខ បើកបរដោយឈ្មោះសុខ លី ភេទប្រុស អាយុ២៥ឆ្នាំ មានទីលំនៅស្រុកឈូក ខេត្តកំពត មានទិសដៅពីខេត្តព្រះសីហនុ ឆ្ពោះទៅភ្នំពេញ លុះដល់ចំណុចខាងលើ បានបត់ឆ្លងកាត់ផ្លូវពី លិច ឆ្ពោះទៅ កើត ក៏មានម៉ូតូ១គ្រឿងទៀត ម៉ាក HONDA MX ពណ៌ស គ្មានផ្លាកលេខ មានទិសដៅពីជើង ឆ្ពោះទៅ ត្បូង បុកម៉ូតូម៉ាក SUZUKI smash ពេញទំហឹងតែម្ដង។
គ្រោះថ្នាក់នេះបណ្ដាលឲ្យរងរបួសមនុស្សម្នាក់ឈ្មោះ សុខ លី បានបញ្ជូនទៅសង្គ្រោះនៅគ្លីនិកលិគឹមឌីវាលរេញ។
ម៉ូតូទាំង២គ្រឿង បានយកមករក្សាទុកនៅអធិការដ្ឋាននគរបាលស្រុកព្រៃនប់ ដើម្បីរង់ចាំការដោះស្រាយបន្ត ៕ ឆ្លាម សមុទ្រ
