លួចកាច់សោ.កម៉ូតូបានសម្រេច អូសចេញប្រហែល១០ម៉ែត្រត្រូវម្ចាស់ម៉ូតូស្រែកចោរៗ សមត្ថកិច្ចក្របួចជាប់

ភ្នំពេញ៖ ជនសង្ស័យម្នាក់ធ្វើសកម្មភាពកាច់សោ.កម៉ូតូបានសម្រេច អូសចេញបាន ប្រហែល១០ម៉ែត្រ ស្រាប់តែជនរងគ្រោះក៏លឺសូរសំឡេងអូសម៉ូតូ ក៏ចេញមកឃើញជនសង្ស័យ ស្រែកថាចោរៗ ក៏ត្រូវបានសមត្ថកិច្ចនគរបាល ប៉ុស្តិ៍រដ្ឋបាលផ្សារដេប៉ូទី៣ ល្បាតការពារសុវត្ថិភាពក្នុងមូលដ្ឋាន ជួយអន្តរាគមន៍ ឃាត់ខ្លួនបាន១នាក់។

ហេតុការណ៍នេះកើតឡើងកាលពីម៉ោងជាង៨យប់ ថ្ងៃអង្គារ ១០រោច ខែចេត្រ នព្វស័ក ព.ស ២៥៦១ ត្រូវនឹងថ្ងៃទី១០ ខែមេសា ឆ្នាំ២០១៨ នៅចំណុចមុខផ្ទះជួលលេខ១៤ CEOZ ផ្លូវលេខ១១០ ក្រុមទី១ ភូមិ១ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ ។

សមត្ថកិច្ចបានឲ្យដឹងថា ជនសង្ស័យ-ឈ្មោះ សេង រិទ្ធ ហៅ រិទ្ធ អាយុ ៣២ឆ្នាំ ជនជាតិខ្មែរ មុខរបរ ពុំពិតប្រាកដ ស្នាក់នៅពុំពិតប្រាកដ មានទីកន្លែងកំណើត ទីរួមខេត្ត កំពង់ឆ្នាំង ។ ចំណែកជនរងគ្រោះមានឈ្មោះ អ៊ុត កញ្ញា ភេទស្រី អាយុ២៥ឆ្នាំ ជនជាតិខ្មែរ មុខរបរ បុគ្គលិក ក្រុមហ៊ុនលក់ទូរស័ព្ទដៃ OPPO ស្នាក់នៅផ្ទះជួលលេខ១៤ CEOZ ផ្លូវ លេខ១១០ ក្រុមទី១ ភូមិ១ សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ ។

វត្ថុតាងចាប់យករួមមាន៖ ដែកសំប៉ែតសំរាប់កាច់កម៉ូតូចំនួន១ , សោខ្សៀរលេខ៨ ចំនួន០១ , ដែកតូចចុងស្រួចសំរាប់ឆ្កឹះចំនួន០១ និងកូនកាំបិត ចុងស្រួចបត់ចំនួន០១ (ជារបស់ជនសង្ស័យធ្វើសកម្មភាពលួច )។ ម៉ូតូមួយគ្រឿងម៉ាក Honda Scoopy I ស៊េរី2012 ពណ៌ស ពាក់ស្លាកលេខ ភ្នំពេញ 1AU-8720 (ជារបស់ជនរងគ្រោះដែលជនសង្ស័យធ្វើសកម្មភាពលួច ) នៅថ្ងៃទី១០ ខែមេសា ឆ្នាំ២០១៨ វេលាម៉ោងប្រហែល ២១និង៣០នាទី ជនរងគ្រោះឈ្មោះ អ៊ុត កញ្ញា បានជិះម៉ូតូមួយគ្រឿងម៉ាក Honda Scoopy I ស៊េរី2012 ពណ៌ស ពាក់ស្លាកលេខ ភ្នំពេញ 1AU-8720 របស់ខ្លួនមកពីកម្មពិធីជប់លៀងវិញ បានយកម៉ូតូមកចតទុកនៅខាងមុខបន្ទប់ជួលផ្ទះលេខ១៤ CEOZ ផ្លូវលេខ១១០ ក្រុមទី១ ភូមិ១ សង្កាត់ផ្សារដេប៉ូទី៣ ខណ្ឌទួលគោក ហើយជនរងគ្រោះបានចាក់សោ.កម៉ូតូត្រឹមត្រូវ រួចចូលទៅក្នុងបន្ទប់ជួលខ្លួនស្នាក់នៅ រហូតដល់ម៉ោងជាង៨ ស្រាប់តែមានជនសង្ស័យឈ្មោះ សេង រិទ្ធ ហៅ រិទ្ធ បានធ្វើសកម្មភាពលួចកាច់កម៉ូតូរបស់ជនរងគ្រោះរួចអូសចេញបាន ប្រហែល១០ម៉ែត្រ ស្រាប់តែជនរងគ្រោះក៏លឺសូសំឡេងអូសម៉ូតូក៏ចេញមកឃើញជនសង្ស័យក៏ស្រែកថាចោរៗក៏ត្រូវបានសមត្ថកិច្ចនគរបាល ប៉ុស្តិ៍រដ្ឋបាលផ្សារដេប៉ូទី៣ ល្បាតការពារសុវត្ថិភាពក្នុងមូលដ្ឋាន ជួយអន្តរាគមន៍ ឃាត់ខ្លួនជនសង្ស័យខាងលើរួមនិងវត្ថុតាង ( ម៉ូតូជនរងគ្រោះ ) យកមកកាន់ទីស្នាក់ការប៉ុស្តិ៍រដ្ឋបាលផ្សារដេប៉ូទី៣ ចាត់ការតាមផ្លូវច្បាប់តែម្ដង ។

បច្ចុប្បន្ន ជនសង្ស័យកំពុងឃាត់ខ្លួនជាបណ្ដោះអាសន្ន នៅអធិការដ្ឋាន នគរបាលខណ្ឌទួលគោក ដើម្បីសាកសួរ កសាងសំណុំរឿង និងបញ្ជូនជនសង្ស័យទៅសាលាដំបូងរាជធានីភ្នំពេញ ចាត់ការតាមនីតិវិធី ៕ ជ្រោយពេជ្រ