រថយន្តតាក់ស៊ី ជែងចូលទៅបុកឡានដឹកកុងតឺន័រពេញទំហឹង បណ្តាលឲ្យស្លាប់២នាក់

ខេត្តព្រះសីហនុ៖ ប្រភពព័ត៌មានប្រចាំថ្ងៃរបស់ស្នងការដ្ឋាន នគរបាលខេត្តព្រះសីហនុ បានឲ្យដឹងថា៖ នៅវេលាម៉ោង២៣និង២០នាទី ថ្ងៃចន្ទ ១រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣០ ខែមេសា ឆ្នាំ២០១៨ មានគ្រោះថ្នាក់ចរាចរណ៍មួយកើតឡើង នៅផ្លូវជាតិលេខ៤ ចន្លោះគីឡូម៉ែត្រ ១២៥-១២៦ ក្នុងភូមិក្រាំងអាត់ ឃុំកំពង់សិលា ស្រុកកំពង់សិលា ខេត្តព្រះសីហនុ ។

ករណីនេះ កើតឡើងរវាងរថយន្តHIGHLANDER មួយគ្រឿង ពណ៌ ស ពាក់ស្លាកលេខភ្នំពេញ2AO-4503 បើកបរដោយឈ្មោះ កែវ ផល្លី ភេទ ប្រុស អាយុ ៤៣ឆ្នាំ មុខរបរ រត់តាក់ស៊ី មានទីលំនៅ ភូមិ១ សង្កាត់លេខ២ ក្រុង /ខេត្តព្រះសីហនុ ដឹកជនជាតិចិន១នាក់ មានទិសដៅពី ភ្នំពេញមក ខេត្តព្រះសីហនុ លុះដល់ចំណុចខាងលើ បានជែងចូលចំណែកផ្លូវម្ខាងទៀត បានកៀររថយន្តដឹកកុងតឺន័រមួយគ្រឿងលេខ3A-0486 ហើយជ្រុលទៅបុករថយន្តដឹកកុងតឺន័រមួយគ្រឿងទៀត ស្លាកលេខ 3B-4172 បញ្ច្រាសទិសគ្នាពេញទំហឹងតែម្តង បណ្ដាលឲ្យស្លាប់ អ្នកជិះក្នុងរថយន្តហាយឡែនឌឺទាំងអស់។

សមត្ថកិច្ចបញ្ជាក់ថា ជនរងគ្រោះចំនួន២នាក់៖ ១-ឈ្មោះកែវ ផល្លី អ្នកបើកបររថយន្ត។ ២-ជនជាតិចិនឈ្មោះAn yan អាយុ២៦ឆ្នាំ។

រថយន្តទាំង៣គ្រឿង សមត្ថកិច្ចនគរបាលស្រុកកំពង់សិលា កំពុងចាត់ចែងស្ទូចចេញ យកមករក្សាទុកនៅអធិការដ្ឋាន។ ចំណែកសាកសពជនជាតិខ្មែរត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ដោយឡែកសាកសពជនជាតិចិន សមត្ថកិច្ចកំពុងទាក់ទងស្ថានទូតសាម៉ី ៕ ឆ្លាម សមុទ្រ