សារព័ត៌មាន នគរវត្ត តែងតែនាំមុខគេជានិច្ច
ខេត្តព្រៃវែង៖ សកម្មជនគណបក្សប្រជាជនកម្ពុជា លោកគ្រូ អ្នកគ្រូខ្មែរឥស្លាម និងតំណាងសមាជិកគណបក្សទូទាំងឃុំមេសរប្រចាន់ បានប្តេជ្ញាថានិង បំពេញសិទ្ធិជាពលរដ្ឋខ្មែរ ទៅបោះឆ្នោត នៅថ្ងៃទី២៩ កក្កដា ២០១៨ នេះ ដើម្បីសម្រេចជ្រើសរើសមេដឹកនាំគណបក្សដែលផ្តល់សេចក្តីសុខសន្តិភាព សេរីភាព ប្រជាធិបតេយ្យ និងអភិវឌ្ឍន៍ នាំប្រទេសជាតិឱ្យរីកចម្រើន ទៅថ្ងៃអនាគត ។
ការប្តេជ្ញានេះ ធ្វើឡើងនៅព្រឹកថ្ងៃព្រហស្បតិ៏១៤ កើត ខែទុតិយាសាឍ ឆ្នាំចសំរឹទ្ធិស័កព.ស២៥៦២ត្រូវនិងថ្ងៃទី២៦ ខែកក្កដា ២០១៨ នៅបរិវេណ ព្រះវិហារភូមិអណ្តូង ក្នុងពិធីសំណេះសំណាល និង ឃោសនារកសម្លេងឆ្នោតជូនគណបក្សប្រជាជនកម្ពុជា ដឹកនាំដោយ លោក អូស្មាន ហាស្សាន់ ប្រធានគណៈចលនាសាសនិកឥស្លាមរបស់គណបក្សប្រជាជនកម្ពុជា និងលោកស្រី ដែលមានវត្តមានពី លោក លីវ សុផារិទ្ធ អនុប្រធានក្រុមការងារចុះជួយ ឃុំមេសរប្រចាន់ និង លោក លោកស្រី សមាជិក សមាជិកា គណៈចលនាសាសនិកឥស្លាម របស់គណបក្សប្រជាជនកម្ពុជា។
លោក អូស្មាន ហាស្សាន់ បានក្រើនរំលឹកដល់អ្នកគ្រប់គ្នាថា ការដោះស្រាយបញ្ហា និងសម្រេចជោគវាសនានៃអនាគតរបស់យើងគឺគ្មានអ្វីសំខាន់ជាងការសម្រេចចិត្តដ៏ត្រឹមត្រូវ ទៅបោះឆ្នោតជូនគណបក្សប្រជាជនកម្ពុជា ដែលឈរនៅលំដាប់លេខរៀងទី២០ ។
លោក អូស្មាន ហាស្សាន់ បានផ្តល់កម្លាំងចិត្ត និង ជំរុញ ដល់សហគមន៍ខ្មែរឥស្លាមរបស់លោក អោយបន្តគាំទ្រគណ បក្សប្រជាជនកម្ពុជាកាន់តែច្រើនឡើងថែមទៀត ទោះបីកន្លងមក សម្លេងគាំទ្ររបស់ខ្មែរឥស្លាម គឺបានគាំទ្រដល់គណបក្សកាន់អំណាចក្នុងកម្រិតភាគរយយ៉ាងខ្ពស់បំផុតក្តី។
ដើម្បីរក្សាបានសុខសន្តិភាព ស្ថេរភាពនយោបាយ និងការអភិវឌ្ឍ សូមបងប្អូនអញ្ជើញទៅបោះឆ្នោតជូនគណ បក្សប្រជាជនកម្ពុជា ដែលមានរូបសញ្ញាទេវតាបាចផ្កា លេខរៀងទី២០លើសន្លឹកឆ្នោត ហើយការបោះឆ្នោតមានតែមួយថ្ងៃគត់គឺថ្ងៃអាទិត្យទី២៩ ខែកក្កដា ឆ្នាំ២០១៨ ៕ សំរិត
