សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានករណីគ្រោះថ្នាក់ចរាចរណ៍គួរឲ្យរន្ធត់តក់ស្លុត និងញាក់សាច់បំផុតរវាងរថយន្តម៉ាក សាំយ៉ុង ពណ៌ លឿង ដឹកឈើមួយគ្រឿងបានបុកជាមួយម៉ូតូដែលបត់ឆ្វេង ខ្វះប្រុងប្រយត្ន័បណ្ដាលឲ្យបុរសម្នាក់ដាច់កស្លាប់ភ្លាម នឹងកន្លែង បង្កការភ្ញាក់ផ្អើលដល់អ្នកភូមិ ចោមរោមមើលកាលពីថ្ងៃ សៅរ៍ ១១ កើត ខែ អស្សុជ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២០ ខែ តុលា ឆ្នាំ ២០១៨ វេលាម៉ោង ៥:១៧ នាទី ល្ងាចលើផ្លូវលេខ ១៣ ចន្លោះគីឡូម៉ែតលេខ ០៦ និង០៧ ស្ថិតក្នុងភូមិ អកនាគ សង្កាត់ សង្ឃ័រ ក្រុង ស្វាយរៀង។
យោងតាមសមត្ថកិច្ចនគរបាលបានបង្ហើបឲ្យដឹងថា រថយន្ដម៉ាក សាំយ៉ុង ពណ៌ លឿង ដែលដឹកឈើពេញពាក់ស្លាកលេខ កំពង់ចាម ២A ៦១០៦ បើកបរដោយបុរសម្នាក់ក្រោយគ្រោះថ្នាក់ចរាចរណ៍ បានបើកទ្វាររថយន្តរត់គេចខ្លួនភ្លាមៗ។
ចំណែកបុរសដែលស្លាប់មានឈ្មោះប្រាក់ សម្បត្តិ អាយុ ៥៤ ឆ្នាំ មុខរបរ កសិករ រស់នៅភូមិ ចំបក់កោង ឃុំ កំពង់ចក ស្រុក រំដួល ខេត្ត ស្វាយរៀង ខណៈជិះម៉ូតូម៉ាកហុងដាសេ ១២៥ ពណ៌ ខ្មៅ ពាក់ស្លាកលេខ ឧត្តរមានជ័យ ១A ៧៣០២ ខូចខាតយ៉ាងដំណំ ។
បើតាមសាក្សីបានឲ្យដឹងថា មុនកើតហេតុ គេឃើញបុរសម្នាក់បានជិះម៉ូតូធ្វើដំណើរជើងទៅត្បូង មិនពាក់មួកសុវត្ថិភាព លើផ្លូវលេខ ១៣ ហើយក៏បានបត់ឆ្វេងខ្វះការប្រុងប្រយត្ន័ស្រាប់តែមានរថយន្តម៉ាក សាំយ៉ុងដែលដឹកឈើពេញមួយគ្រឿង បើកស្របទិសគ្នាមកពីក្រោយចាប់ហ្វ្រាំងមិនទាន់ ក៏បុកផ្ទប់យ៉ាងពេញទំហឹងបណ្ដាលឲ្យបុរសជិះម៉ូតូដាច់កចេញពីខ្លួនស្លាប់ភ្លាមៗគួរឲ្យសង្វេគ និងតក់ស្លុតបំផុត។
ក្រោយមក អ្នកបើករថយន្តដោយឃើញសភាពការណ៍មិនស្រួល ក៏រត់គេចខ្លួនបន្សល់ឈើពេញក្នុងរថយន្ត។
ចំណែកសាកសពត្រូវបានសមត្ថកិច្ចមូលដ្ឋានធ្វើកំណត់ហេតុ និងប្រគល់ឲ្យក្រុមគ្រួសារយកមកធ្វើបុណ្យតាមប្រពៃណី។
ចំពោះមធ្យោបាយម៉ូតូ និងរថយន្តត្រូវបានសមត្ថកិច្ចអូសយកមករក្សាទុកនៅការិយាល័យនគរបាលចរាចរណ៍ខេត្តស្វាយរៀងដើម្បីចាត់ការបន្តតាមច្បាប់ ៕ យឹម សុថាន
