សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់រងរបួសធ្ងន់ធ្ងរ ដោយសារករណី គ្រោះថ្នាក់ចរាចរណ៍ បន្ទាប់ពីរថយន្តម៉ាកសាំយ៉ុង មួយគ្រឿង ទិសដៅបញ្ច្រាសគ្នា ហើយបានបត់ឆ្វេង ខ្វះប្រុងប្រយ័ត្ន បុកជាមួយម៉ូតូយ៉ាងពេញទំហឹង លាន់ដូចរន្ទះ បង្កការភ្ញាក់ផ្អើលដល់អ្នកភូមិ និងអ្នកធ្វើដំណើរចោមរោមមើល កាលពីថ្ងៃទី១៥ខែ វិច្ឆិកា ឆ្នាំ២០១៨ វេលាម៉ោង៦ និង២០នាទីព្រលប់ នៅលើផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ១៥៣>១៥៤ ស្ថិតក្នុងភូមិព្រៃទប់ សង្កាត់ព្រៃអង្គុញ ក្រុងបាវិត ខេត្តស្វាយរៀង ។
យោងតាមសមត្ថកិច្ចនគរបាលក្រុងបាវិតបានឲ្យដឹងថា បុរសដែលរងរបួសធ្ងន់ធ្ងរ មិនត្រូវបានស្គាល់ឈ្មោះនោះទេ ក្រោយកើតហេតុ សមត្ថកិច្ចបានបញ្ជូនមកសង្គ្រោះនៅមន្ទីរពេទ្យបង្អែកជីភូ ។
ចំពោះអ្នកបើករថយន្តបង្កហេតុ ត្រូវបានស្គាល់ឈ្មោះស្វាយ ចន្ថា ភេទប្រុស អាយុ៤៨ឆ្នាំ ជនជាតិខ្មែរ មុខរបរបើករថយន្ត មានទីលំនៅខេត្តពោធិ៍សាត់ ។
បើតាមសាក្សីបានឲ្យដឹងថា បុរសរងគ្រោះជិះម៉ូតូ ម៉ាកហុងដា ពណ៌ខ្មៅ ពាក់ស្លាកលេខ ភ្នំពេញ 1CE.5142 នៅលើផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ១៥៣>១៥៤ ពីលិចមកកើត ខណៈនោះស្រាប់តែមានរថយន្ត០១គ្រឿង ម៉ាកសាំយ៉ុង ពណ៌ស ពាក់ស្លាកលេខ ភ្នំពេញ 2X.0881 បើកបរក្នុងទិសដៅបញ្ច្រាសគ្នា ហើយបានបត់ឆ្វេងមិនប្រយ័ត្ន ក៏បុកគ្នាយ៉ាងពេញទំហឹងលាន់ដូចរន្ទះបង្កការភ្ញាក់ផ្អើលតែម្ដង។
ក្រោយពីបង្កហេតុរួច អ្នកបើកបររថយន្តដោយឃើញសភាពការណ៍មិនស្រួល ក៏បានរត់គេចខ្លួនបាត់ពីកន្លែង បន្សល់ទុកតែរថយន្តនៅកន្លែងកើតហេតុ ។
បច្ចុប្បន្ន អ្នករងរបួសធ្ងន់ត្រូវបានសង្គ្រោះនៅមន្ទីរពេទ្យបង្អែកជីភូ ក្រុងបាវិត រីឯវត្ថុតាងទាំង២គ្រឿង សមត្ថកិច្ចមករក្សាទុកនៅអធិការដ្ឋាននគរបាលក្រុងបាវិត ដើម្បីបំពេញសំណុំរឿងទៅតាមនីតិវិធី ៕ យឹម សុថាន
