មនុស្សប្រុសស្រី៤នាក់ជួបគ្រោះថ្នាក់ចរាចរណ៍ ស្លាប់មួយ របួសធ្ងន់៣

ខេត្តកំពងធំ៖ បុរសចំណាស់ម្នាក់ស្លាប់ និងប្រុស ស្រី៣នាក់ទៀត រងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍ រវាងរថយន្ត បុកម៉ូតូបើកបរឆ្លងកាត់ផ្លូវ ព្រមទាំងខូចខាតម៉ូតូ០១គ្រឿង កាលពីវេលាម៉ោង១៧និង៥៧នាទី ថ្ងៃសៅរ៍ ០៥កើត ខែមាឃ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៩ ខែកុម្ភៈ ឆ្នាំ២០១៩ លើកំណាត់ផ្លូវជាតិលេខ០៦ ចន្លោះគីឡូម៉ែត្រលេខ១៣៧-១៣៨ ភូមិប្រាសាទ ឃុំប្រាសាទ ស្រុកសន្ទុក ខេត្តកំពង់ធំ។

សមត្ថកិច្ចបានឲ្យដឹងថា ម៉ូតូហុងដាវេវ ពណ៌ក្រហម ផ្លាកលេខស្វាយរៀង1C.1197 បើកបរឆ្លងកាត់ផ្លូវពីកើតទៅលិច ដោយឈ្មោះ ជួន.ឃន ភេទប្រុស អាយុ៦៧ឆ្នាំ មុខរបរ កសិករ នៅភូមិបឹងល្វា ឃុំបឹងល្វា ស្រុកសន្ទុក ខេត្តកំពង់ធំ របួសធ្ងន់ មិនពាក់មួកសុវត្ថិភាព ។

អ្នករួមដំណើរចំនួន៣នាក់ ១-ឈ្មោះ ហ៊ិន.ណាក ភេទស្រី អាយុ៦៦ឆ្នាំ មុខរបរ កសិករ ស្លាប់នៅកន្លែងកើតហេតុ មិនពាក់មួកសុវត្ថិភាព ។ ២-ឈ្មោះ ឌុល.គាវ ភេទប្រុស អាយុ០៧ឆ្នាំ មុខរបរសិស្ស របួសធ្ងន់ មិនពាក់មួកសុវត្ថិភាព ។៣-ឈ្មោះ ឌុល.ពេត ភេទប្រុស អាយុ០៣ឆ្នាំ របួសធ្ងន់ មិនពាក់មួកសុវត្ថិភាព អ្នកទាំងបីនៅភូមិ ឃុំជាមួយអ្នកបើកបរម៉ូតូ។

ចំណែក រថយន្តម៉ាកនីសាន់ ពណ៌ស ផ្លាកលេខកំពង់ចាម3A.0828 បើកបរទិសដៅពីត្បូងទៅជើង អ្នកបើកបរមិនស្គាល់អត្តសញ្ញាណ គេចខ្លួន ។

ក្រោយកើតហេតុសមត្ថកិច្ចបានឲ្យដឹងថា មូលហេតុបឋមបង្កឡើងដោយអ្នកបើកបរម៉ូតូ បើកបរឆ្លងកាត់ផ្លូវខ្ជីខ្ជារខ្វះការប្រុងប្រយ័ត្ន បន្ទាប់មកបានចុះវាស់វែងធ្វើកំណត់ហេតុ បញ្ជូនជនរងគ្រោះទៅមន្ទីរពេទ្យ និងប្រមូល វត្ថុតាងយករក្សាទុកនៅអធិការដ្ឋាននគរបាលស្រុកសន្ទុករង់ចាំដោះស្រាយគ្នាជាក្រោយ ចំណែកសាកសពត្រូវបានសាច់ញាតិ និងក្រុមគ្រួសារចាត់ចែងធ្វើបុណ្យតាមប្រពៃណី ៕ប៊ុនរិទ្ធី