សារព័ត៌មាន នគរវត្ត តែងតែនាំមុខគេជានិច្ច
ក្លិប Manchester City បានប្រកាសជាផ្លូវការនៅថ្ងៃសៅរ៍ថា បានចុះហត្ថលេខានាំយកខ្សែប្រយុទ្ធស្លាបវ័យក្មេង Jeremy Monga ពីក្លិប Leicester City ក្នុងកិច្ចសន្យារយៈពេល ៥ ឆ្នាំ។
Monga បានបង្ហាញខ្លួននៅក្របខណ្ឌ Premier League ជាលើកដំបូងឱ្យ Leicester នៅអាយុត្រឹម ១៥ ឆ្នាំ ហើយសម្រេចចិត្តផ្ទេរមក Manchester City ទោះបីមានការចាប់អារម្មណ៍ពីក្លិបធំៗជាច្រើនក៏ដោយ។
កីឡាករវ័យ ១៧ ឆ្នាំ រូបនេះ បានបង្ហាញខ្លួនឱ្យ Leicester សរុប ៣៧ ប្រកួត និងក្លាយជាកីឡាករវ័យក្មេងបំផុតដែលធ្លាប់ចាប់ផ្តើមការប្រកួតឱ្យក្លិបនេះ។
ទោះបីក្លិបមិនបានបង្ហាញតម្លៃផ្ទេរជាផ្លូវការក៏ដោយ ប៉ុន្តែសារព័ត៌មានអង់គ្លេសរាយការណ៍ថា ការផ្ទេរនេះមានតម្លៃប្រមាណ ១០ លានផោន (ប្រហែល ១៣ លានដុល្លារ) បូករួមប្រាក់លើកទឹកចិត្តផ្សេងៗ ហើយកិច្ចសន្យានឹងមានសុពលភាពរហូតដល់ឆ្នាំ 2031។
Monga គឺជាកីឡាករអង់គ្លេសទី៣ ដែលបានចូលរួមជាមួយ Manchester City ក្នុងទីផ្សារដោះដូរកីឡាកររដូវក្តៅនេះ ខណៈអ្នកចាត់ការថ្មី Enzo Maresca កំពុងកែប្រែក្រុមឡើងវិញ បន្ទាប់ពីបាននាំយកអ្នកចាំទី Pierce Charles និងខ្សែបម្រើ Elliot Anderson ដែលជាការផ្ទេរមានតម្លៃខ្ពស់បំផុតក្នុងប្រវត្តិសាស្ត្រក្លិប។
Monga បានបង្ហាញខ្លួនលើកដំបូងនៅ Premier League ក្នុងនាមជាកីឡាករបម្រុង នៅការប្រកួតដែល Leicester ចាញ់ Newcastle 3-0 កាលពីខែមេសា ឆ្នាំ 2025 ក្រោមការដឹកនាំរបស់ Ruud van Nistelrooy។ គាត់ក៏បានចាប់ផ្តើមជម្រើសដំបូងលើកដំបូងក្នុងការប្រកួត League Cup ទល់នឹង Huddersfield នៅខែសីហា ឆ្នាំ 2025 ផងដែរ។
កីឡាករជម្រើសជាតិអង់គ្លេសអាយុក្រោម 19 ឆ្នាំរូបនេះ ក៏ជាកីឡាករវ័យក្មេងទី៣ ដែលបានបង្ហាញខ្លួននៅ Premier League បន្ទាប់ពី Ethan Nwaneri និង Max Dowman។
Jeremy Monga បាននិយាយថា៖
«នៅពេលខ្ញុំដឹងថា Manchester City ចាប់អារម្មណ៍លើខ្ញុំ ខ្ញុំដឹងភ្លាមថា នេះគឺជាជម្រើសដ៏ត្រឹមត្រូវសម្រាប់ខ្ញុំ។
សម្រាប់កីឡាករវ័យក្មេងគ្រប់រូប ការបានចូលរួមជាមួយក្លិបដ៏អស្ចារ្យបែបនេះ គឺជាសុបិនក្លាយជាការពិត។ Manchester City គឺជាក្លិបល្អបំផុតនៅអង់គ្លេសក្នុងរយៈពេល ១០ ឆ្នាំចុងក្រោយ។ ក្លិបក៏បានផ្តល់ឱកាសដល់កីឡាករចេញពីថ្នាលយុវជនដូចជា Phil Foden និង Nico O’Reilly ដែលបង្ហាញថា ផ្លូវទៅកាន់ក្រុមធំមានពិតប្រាកដ។ វាជាកិត្តិយសដ៏ធំសម្រាប់ខ្ញុំ ហើយខ្ញុំពិតជារីករាយដែលបានក្លាយជាកីឡាកររបស់ Manchester City។»
