សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀ៖ បុរសម្នាក់បានរងរបួសបាក់ជើងឆ្វេងលៀនឆ្អឹង និងរយះសាច់គួរឲ្យរន្ធត់សន្លប់ស្ដូកស្ដឹង នឹងកន្លែងដោយសារករណីគ្រោះថ្នាក់ចរាចរណ៍ ត្រូវរថយន្តបើកស្របទិសគ្នាបើកកៀរ និងកិនបន្ថែមពេញទំហឹងកាលពីវេលាម៉ោង៤ និង៤០នាទីរសៀល ថ្ងៃទី០៦ ខែឧសភា ឆ្នាំ ២០១៩ លើផ្លូវលេខ០១ ចន្លោះគីឡូម៉ែត្រ ១៣៦ និង១៣៧ស្ថិតនៅ ភូមិប្រសូត្រ២ ឃុំកណ្តៀងរាយ ស្រុកស្វាយទាប ខេត្តស្វាយរៀង ។
យោងតាមសមត្ថកិច្ចនគរបាល ស្រុកបានឲ្យដឹងថា បុរសរងគ្រោះមានឈ្មោះវង់ ឌីណា អាយុ៣១ ឆ្នាំ មុខរបរ កសិករ រស់នៅ ភូមិថ្នល់កែង ឃុំកណ្តៀងរាយ ស្រុកស្វាយទាប ខេត្តស្វាយរៀង ខណៈជិះម៉ូតូម៉ាកស៊ុយសូគីវីវ៉ា ពណ៌ខ្មៅ ពាក់ស្លាកលេខ ស្វាយរៀង១B៦០២៨ ខូចខាតយ៉ាងដំណំ ។ ចំណែកអ្នកបង្កហេតុត្រូវបានស្គាល់ឈ្មោះសុខ ណាវី ភេទប្រុស អាយុ២៥ ឆ្នាំ មុខរបរបើកបរ រស់នៅ ភូមិពូលួង ឃុំ សុខដុម ស្រុកសែនមនោរម្យ ខេត្តមណ្ឌលគីរី ដោយបើករថយន្តម៉ាកម៉ាកហ៊ីយ៉ាន់ដាយ ពណ៌ទឹកប្រាក់ អត់ស្លាកលេខ ។
តាមសាក្សីបានឲ្យដឹងថា មុនកើតហេតុគេឃើញបុរសម្នាក់បានបើករថយន្តបែនដឹកដីមួយគ្រឿងម៉ាក ហ៊ីយ៉ាន់ដាយ ពណ៌ទឹកប្រាក់អត់ ស្លាកលេខ ធ្វើដំណើរ ទិសដៅពីលិចទៅកើត ផ្លូវលេខ០១ ចន្លោះគីឡូម៉ែត្រ ១៣៦ និង១៣៧ ខណៈនោះស្រាប់តែកៀរម៉ូតូមួយគ្រឿង ម៉ាកស៊ុយសូគីវីវ៉ា ពណ៌ខ្មៅ ពាក់ស្លាកលេខ ស្វាយរៀង ១B ៦០២៨ ជិះម្នាក់ឯងក្នុងទិសដៅស្របគ្នាបណ្ដាលឲ្យដួលហើយក៏បានកិនបន្ថែមទៀត ធ្វើឲ្យរងរបួសបាក់ជើងឆ្វេងលៀនឆ្អឹង និងរយះសាច់គួរឲ្យរន្ធត់សន្លប់ស្ដូកស្ដឹង នឹងកន្លែង ។
ក្រោយមកអ្នកបើករថយន្តមិនបានឈប់នោះទេ បានបើករត់ដល់ពាក់កណ្ដាលផ្លូវទើបសមត្ថកិច្ចឃាត់បានទាំងមនុស្ស និងរថយន្ត ។
អ្នករងរបួសត្រូវបានសមត្ថកិច្ចបញ្ជូនទៅព្យាបាលនៅមន្ទីរពេទ្យ ខេត្តស្វាយរៀង ចំណែកម៉ូតូរថយន្តព្រមទាំងមនុស្សបាននាំមកសាកសួរ និងអូសយកទុកនៅអធិការដ្ឋាននគរបាល ស្រុកស្វាយទាប ដើម្បីដោះស្រាយតាមច្បាប់ ៕ យឹម សុថាន
