សិស្សសាលា២នាក់ ឆក់កាបូបជនបរទសមិនបានសម្រេច ដួលម៉ូតូត្រូវបានសមត្ថកិច្ចប៉ុស្តិ៍នគរបាលវត្តភ្នំឃាត់ខ្លួន

ភ្នំពេញ ៖ សិស្សសាលា២នាក់ បើកម៉ូតូ Nex ឌុបគ្នា ធ្វើសកម្មភាពឆក់កាបូបពីជនបរទេស កំពុងតែដើរតាមផ្លូវ តែមិនបានសម្រេច ហើយនាំគ្នាជិះរត់គេចខ្លួន ទាំងភ័យស្លន់ស្លោ ដួលម៉ូតូ ត្រូវបានប្រជាពលរដ្ឋ និងសមត្ថកិច្ចសហការគ្នាឃាត់ខ្លួនបានទាំង២នាក់ភ្លាមៗ ក្នុងនោះមានម្នាក់ ពាក់ឯកសណ្ឋានសិស្សសាលានៅឡើយ ។

ហេតុការណ៍នេះ បានកើតមានឡើងនៅម៉ោងជិត១រសៀល ថ្ងៃសុក្រ ទី១៧ ខែឧសភា ឆ្នាំ២០១៩ នៅតាមបណ្ដោយផ្លូវលេខ១០២ កែងផ្លូវលេ១៩ ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ។

ប្រភពព័ត៌មាននៅកន្លែងកើតហេតុ បានឲ្យដឹងថា នៅមុនពេលកើតហេតុ គេបានឃើញជនបរទេសមួយក្រុម មានប្រុសមានស្រី កំពុងតែដើរតាមផ្លូវ និងមានអ្នកកាន់កាបូប និងស្ពាយកាបូបនៅជាប់ដៃ ដោយមិនបានប្រុងប្រយ័ត្ន ទើបជនសង្ស័យ២នាក់ កំពុងបើកម៉ូតូ១គ្រឿង ម៉ាក Suzuki Nex ពណ៌ស ពាក់ស្លាកលេខកណ្ដាល 1W-0685 ឌុបគ្នាមកអែបពីក្រោយ រួចធ្វើសកម្មភាពឆក់យកកាបូបរបស់ជនបរទេស តែមិនបានសម្រេច ហើយក៏ជិះរត់គេចខ្លួន ទាំងភ័យស្លន់ស្លោ ក៏រអិលកង់ម៉ូតូដួល រួចនាំគ្នារត់ចោលម៉ូតូ មិនបាន១០០ម៉ែត្រផង បង្កឲ្យមានការភ្ញាក់ផ្អើលដល់បងប្អូនប្រជាពលរដ្ឋ និងសមត្ថកិច្ច សហការគ្នាឃាត់ខ្លួនបានទាំង២នាក់ភ្លាមៗ ក្នុងនោះមានម្នាក់ពាក់ឯកសណ្ឋានសិស្សសាលាផងដែរ ហើយត្រូវបានសមត្ថកិច្ចវាយខ្នោះបញ្ជូនទៅសាកសួរនៅស្នាក់ការប៉ុស្តិ៍វត្តភ្នំ ។

បច្ចុប្បន្ន ជនសង្ស័យទាំង២នាក់ នៅមិនទាន់ស្គាល់អត្តសញ្ញាណនៅឡើយនោះទេ ហើយសមត្ថកិច្ចកំពុងតែសួរនាំនៅប៉ុស្តិ៍ ៕ ជ្រោយពេជ្រ